Namangan davlat universiteti talabasi, farg‘onalik Mirzoozod Mirzane’matov oilaviy sharoiti tufayli o‘qishni davom ettirolmasligini bildirib, rektor nomiga ariza yozgandi. Bu haqda “Daryo” muxbiri Azizbek Abduvaliyev xabar bermoqda.
Mirzoozodning aytishicha, bundan oldin onasi talaba o‘g‘liga ta’lim krediti olish uchun bir necha bankka borgan, biroq ishi bitmagan. Turli vaj-korsonlar bilan kredit ajratish masalasi keyinga surilgan.
U mazkur holat haqida 2-oktabr kuni Facebook ijtimoiy tarmog‘ida post qoldiradi.
“Har narsadan bir hikmat izlashga yetgan aqlim, 6 yillab o‘qishga kirolmaganimda, balki hech qachon o‘qimaslik peshonamga yozilgandir, deyishga yetmagandir balki. Mayli, bundayam bir hikmat bordir. Mirzoozod qattiq harakat qildi, ammo yengildi. Boshqa narsa deyolmayman, chunki tomog‘imga shundog‘am bir nimalar tiqilib turibdi. Ustozlarim va Namangan xalqiga aytadigan oxirgi gapim — bergan sabog‘ingiz va non-tuzingizga rozi bo‘ling”, — deyiladi unda.
Ushbu post e’lon qilingach 200 ga yaqin izoh qoldiriladi va ularning aksariyatida moddiy ko‘mak taklif etiladi. Shuningdek, Mirzoozodga universitet rektori, Yoshlar Ittifoqi viloyat kengashi raisi qo‘ng‘iroq qilib, o‘qishni albatta davom ettirishi zarurligini ta’kidlaydi. Yoshlar Ittifoqi harbiy imtiyozga ega talaba kontraktining 35 foizini to‘lab berishga tayyor ekanligi ham bildiriladi.
—Bu postni Namangan viloyati hokimi Xayrullo Bozorov ham o‘qigan ekan. Meni chaqirtirib, tahsilni tashlash haqida aslo o‘ylamasligim, aksincha, o‘qishni yanada kuchaytirishim kerakligini aytib, tanbeh berdi. 7-oktabr kuni 10 million 792 ming so‘m bo‘lgan shartnoma puli u kishi tomonidan 11 million so‘m qilib to‘lab berildi. Yoshlar Ittifoqining ko‘magi esa kelgusi yilga asqotadigan bo‘ldi, — deydi talaba.
Qiziq tomoni, kontrakt puli to‘lab berilgan kun Mirzoozodning tavallud sanasi bo‘lgan. O‘zining aytishicha, tug‘ilgan kuniga bundan ortiq sovg‘ani tasavvur etish ham mushkul edi.
—Viloyat hokimi bu xolis yaxshilik ekanligi, ovoza qilish kerakmasligi tayinlagandi, ammo bu gal u kishining aytganini qilolmadim. Ustiga-ustak, to‘lovchi sifatida ham mening nomim qayd etilgan. Balki bu ko‘mak kimlargadir o‘rnak bo‘lar? — deydi Mirzoozod.
Ma’lumot uchun, Mirzaozod Mirzane’matov 1994-yilda Farg‘ona viloyatining Rishton tumanida tug‘ilgan. NamDU pedagogika fakulteti ikkinchi bosqich talabasi. O‘zining aytishicha, “bir necha kitobga yetgulik” yuzlab she’rlar muallifi.
Izoh (0)