Арнасой туманида хизмат сафарида бўлган Тошкент шаҳар ИИББ ходимини ҳеч бир сабабсиз калтаклаб, темир устунга боғлаб қўйиб, азоблаган шахсга суд ҳукми ўқилди. Бу ҳақда Жиноят ишлари бўйича Мирзачўл туман суди «Дарё»га маълум қилди.
С.Салимов (исм шарифлар ўзгартирилган) 2019 йил 8 августдан 9 августга ўтар кечаси Арнасой тумани ҳудудидаги дўконида (дўкон С.Салимовнинг хонадонида жойлашган) шериклари М.Турсунов ва Р.Валиевлар билан бирга спиртли ичимлик истеъмол қилиб ўтирганида уларнинг олдига спиртли ичимлик бор ёки йўқлигини сўраш учун келган Арнасой туманида хизмат сафарида бўлган Тошкент шаҳар ИИББ ходими сержант Н.Набиев келган.
С.Салимов ИИБ ходимини ушлаб олиб, ҳеч бир сабабсиз, маст ҳолатда унинг юз ва тана қисмига қўли билан бир неча маротаба урган. Зўрлик ишлатиб Н.Набиевни уйининг кириш жойидаги темир устунга арқон билан қўл ва оёқларидан боғлаб қўйиб, унинг тан жароҳати олиб ёрдамга муҳтожлигини билган ҳолда унга жисмоний азоб бериб, зўрлик ишлатиб 30 дақиқадан ортиқ вақт мобайнида ғайриқонуний равишда озодликдан маҳрум этган.
Н.Набиев билан бирга С.Салимовнинг яшаш хонадонига келган шериклари А.Йўлчиев ва О.Жалиловлар унга ёрдам бериш мақсадида ички ишлар ходимларини чақириш учун воқеа жойидан қочиб кетган.
Шундан сўнг Н.Набиев маҳалла профилактика инспектори томонидан қутқариб олинган.
Суд тергови давомида судланувчи С.Салимов айбига тўлиқ иқрорлигини, содир этган қилмишидан пушаймондалигини билдирган. Жиноят ишлари бўйича Мирзачўл туман суди 24 сентябрь кунги суд мажлисида С.Салимовни содир этган жинояти юзасидан Жиноят кодексининг 138-моддаси 2-қисми «а» банди билан айбдор деб топиб, уч йил муддатга озодликни чеклаш жазоси тайинлади.
Изоҳ (0)