АҚШ Туркиянинг Сурия шимолидаги ҳаракатларида иштирок этмайди

Оқ уй АҚШ ҳарбий кучлари Туркиянинг Сурия шимолида ўтказаётган ҳарбий ҳаракатларини қўллаб-қувватламаслиги ва уларда иштирок этмаслигини маълум қилди. Шунингдек, расмий Вашингтон ҳудудда асирга олинган ИШИД жангарилари учун масъулият энди Анқарада эканини қайд этган. Бу ҳақда «Коммерсантъ» хабар берди.

«Туркия яқин орада Сурия шимолида анчадан буён режалаштириб юрган ҳарбий ҳаракатларини амалга оширади. АҚШ ҳарбий кучлари ушбу ҳаракатларни қўллаб-қувватламайди ёки уларда иштирок этмайди. ИШИД ҳалифалигини енгган АҚШ кучлари ҳам ушбу ҳарбий ҳаракатлар ҳудудидан узоқда бўлади»,— дейилган АҚШ президенти администрациясининг баёнотида.

Оқ уй баёнотида энди охирги икки йил ичида асирга олинган ИШИД жангарилари учун масъулият Туркия ихтиёрида бўлиши ҳам таъкидланган.

Аввал Туркия президенти Ражаб Тоййиб Эрдўғон Сурия билан чегара ҳудудига қўшимча ҳарбий кучлар юборилишини ва Фрот дарёси шарқига яқин ҳудудда ҳарбий ҳаракатларни амалга оширилиши юзасидан тайёргарлик якунига етганилигини маълум қилган.

Туркия президенти Фрот дарёсининг шарқий томонидаги ерлар юзасидан режалар ҳақида августда эълон қилган. Ўшанда Сурия шимолида хавфсиз ҳудуд тузиш бўйича Туркия—Америка музокаралари ҳам ўтказилганди, келишувларга кўра ики томон маслаҳатлашув кенгаши тузиб режалаштирилган ҳудудда қўшма операцияларни амалга оширишни келишиб олганди. Эрдўғон музокаралар вақтида агар Вашингтон хавфсиз зона шакллантирилишини кечиктирса, Анқара Суриядаги ҳудудни бошқараётган куртларга қарши ҳарбий операция бошлашини билдирган. 1 октябрда турк етакчиси Анқара хавфсиз ҳудудни ҳеч бир давлат ёрдамисиз мустақил тарзда тузишини таъкидлади. Сурия ТИВ раҳбари Валид Муаллим эса Нью-Йоркдаги БМТ Бош Ассамблеясида АҚШ ва Туркия режаларининг халқаро ҳуқуқ меъёрларига зид эканлигини айтган.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.