Афғонистон президенти ТИВ матбуот котибини ишдан ҳайдади. Мамлакат бош вазири еса уни ўз лавозимига қайта тиклади

Афғонистон президенти Муҳаммад Ашраф Ғани Ташқи ишлар вазирлиги матбуот котиби Сибгатулло Аҳмадийни «Толибон» ҳаракати делегациясининг Покистонга ташрифи ҳақида фикр билдиргани учун ишдан ҳайдади, деб ёзади «Afganistan.ru».

Ташқи ишлар вазирлиги расмий вакили «Толибон» ҳаракатининг Исломободга ташрифини қўллаб-қувватлаганди. Аҳмадий ижтимоий тармоқдаги хабарида Покистон томонидан амалга оширилаётган ҳаракатлар Афғонистонда тинчликни таъминлашга хизмат қилишини қайд этган.

Оқибатда президент саройи Покистонда «Толибон» ҳаракати делегациясининг қабул қилиниши дипломатик нормаларни бузиш эканлиги, ТИВ расмий вакилининг бунга берган шарҳи эса ҳукумат позициясини англатмаслиги ва шахсий фикр эканлигини қайд этди.

Якшанбада давлат раҳбари Аҳмадийни эгаллаб турган лавозимидан четлатди ва унинг ўрнига Мирвайс Набини тайинлади.

7 октябрь куни Афғонистон бош вазири, ҳукумат раҳбари Абдулла Абдулла президент Муҳаммад Ашраф Ғанининг ТИВ матбуот котиби Сибгатулло Аҳмадийнинг ишдан олиниши юзасидан чиқарган қарорини ўзгартирди. Бу ҳақда бош вазир матбуоти котиби Мужиб Раҳимийга таяниб «Интерфакс» хабар берди.

«Сибгатулло Аҳмадий тинчлик жараёни ҳақида фикр билдирган вақтида мамлакат ташқи ишлар вазирлиги нуқтайи-назарини ҳам кўзда тутган. Бундай даврда тайинлов ёки ишдан бўшатишни сайловлар натижалари маълум бўлганидан сўнг, амалга ошириш мақсадга мувофиқ. Натижалар эълон қилингунига қадар улар ўз иш фаолиятини давом эттираверади.Ташқи сиёсат ва афғон ҳукуматининг бу борадаги позицияси масалалари алоҳида юқори даражадаги муҳокамалар ва ҳукумат билан келишув асосида ҳал этилади. Шунда ҳукуматнинг барча таркибий қисмлари бир позицияда туриши ва бир овоздан гапириши таъминланади», — дейилади бош вазирнинг матбуот котиби эълон қилган баёнотда.