АҚШ расмийлари Россия Мальта Satabank’дан махфий тўловлар ўтказиш учун фойдаланганини тахмин қилмоқда. Тўловлар Ливия, Италия ва Мальта ҳудудидаги нефть контрабандачилари Даррен ва Гордон Дебонога бориб тақалади. Бу ҳақда Meduza хабар бермоқда.
Даррен Дебононинг номи Мальта янги тарихидаги энг шов-шувли қотиллик — икки йил аввал журналист Дафна Галициянинг автомобили портлатилиши билан билан боғлиқ ҳолда тилга олинмоқда. Галиция ўлимидан аввал Мальтадаги идоралар, ливиялик савдогарлар ва Сицилия мафиясининг нефть контрабандасига алоқадорлиги тўғрисидаги маълумотларни тўплаётганди.
2017 йил октябрида Италия полицияси Мальта терма жамоасининг собиқ футболчиси Даррен Дебоно ва унинг уч нафар шеригини ёқилғи ноқонуний айланмасида айблаб, қамоққа олганди. Орадан бироз вақт ўтиб Дебонони гаровга қўйиб юборишди, 2018 йил ноябрида эса ватанига қайтишга рухсат берилди. Ҳозирда у Мальтанинг «Сенглеа Атлетик» футбол клуби раҳбарларидан бири саналади.
2019 йил июлида БМТ Хавфсизлик Кенгаши йиғилишида Мальта Даррен ва Гордон Дебонони ташкилот санкциялари остидаги шахслар рўйхатига киритишни таклиф қилди, бироқ Россия уларнинг тарафини олиб, қарорга вето қўйди.
Дебононинг гуруҳи Мальта шарқидаги ушбу давлат ҳудудий сувларига кирмайдиган Hurd’s Bank номли саёзлик орқали ноқонуний нефть ташийди. Россия ҳам айнан шу ҳудуд орқали АҚШ санкциялар қўллаган Венесуэлага енгил нефть (бу Венесуэланинг оғир таркибли нефтига аралаштириш учун керак) етказиб бериши гумон қилинади.
Изоҳ (0)