Халқаро ҳунармандчилик фестивалини ўтказиб боришга оид чора-тадбирлар тўғрисида Ўзбекистон Президенти фармони қабул қилинди. Бу ҳақда Адлия вазирлигининг Telegram’даги «Ҳуқуқий ахборот» канали хабар берди.
Фармонга мувофиқ, ҳар икки йилда бир марта сентябрь ойида Қўқон шаҳрида Халқаро ҳунармандчилик фестивали ўтказилади.
Шунингдек, фестиваль доирасида «Ҳунармандчилик ва халқ амалий санъатини ривожлантириш истиқболлари» мавзусидаги илмий-амалий конференция ҳам ўтказилади.
Фестивальнинг асосий вазифаларидан бири ҳунармандларни ҳар томонлама қўллаб-қувватлаш, бой маданий меросни дунё ҳамжамияти ўртасида тарғиб этишдан иборат.
Эслатиб ўтамиз, жорий йилнинг сентябрь ойида бўлиб ўтган I Халқаро ҳунармандчилик фестивали давомида Бутунжаҳон ҳунармандларининг Осиё—Тинч океани кенгаши Қўқон шаҳрини Бутунжаҳон ҳунармандлар шаҳарлари рўйхатига киритди. Соҳибқирон Амир Темур муҳр-узуги нусхасини яратган қашқадарёлик ҳунарманд Шарифжон Раупов фестивалда 78 та мамлакатдан иштирок этган ёш ҳунармандларнинг энг кучлиси деб топилди.
Изоҳ (0)