Microsoft корпорацияси Нью-Йоркдаги тақдимот вақтида икки экранли Surface Neo планшетини тақдим этди. Экранларнинг ҳар бири тўққиз дюймдан иборат ва йиғилган вақтда Moleskine металл блокнотига ўхшайди, деб хабар беради Meduza.
Neo йиғма экранлар учун мўлжалланган махсус операцион тизим — Windows 10Х’да ишлайди. Планшетдан фойдаланишни фойдаланувчининг ўзи ҳал қилади: қурилмадан икки томони экран бўлган очилган ҳолатда ёки ҳар бирини алоҳида ишлатиш мумкин. Қурилма учун алоҳида махсус клавиатура ҳам ишлаб чиқилган.
Microsoft ушбу планшетларни 2020 йилнинг охирига қадар сотувга чиқариш ниятида. Ҳозирча компания қурилманинг нархини ҳам, техник тавсифини ҳам ошкор этмади.
Surface Neo билан биргаликда Microsoft Office билан ҳамкорликда ишлай оладиган Surface Earbuds симсиз қулоқчинлари ҳам тақдим этилди. Масалан, унинг ёрдамида тақдимотдаги слайдларни ўзгартириш, реал вақтда таржимондан фойдаланиш мумкин. Симсиз қурилма бир марта қувватланиш орқали 24 соат ишлай олади. Surface Earbuds нархи 249 доллар.
Бундан ташқари, Microsoft тезкор қувватланиш хусусиятига эга Surface Laptop 3 ноутбукини ҳам тақдим этди. У бир соат ичида 80 фоизга қувватлана олади. 13,5 ва 15 дюймли версиялари процессорлари билан бир-биридан фарқ қилади. Биринчисига Intel’нинг тўрт ядроли ўнинчи авлоди ўрнатилган бўлса, иккинчисига — AMD Ryzen Surface Edition ўрнатилган. 13,5 дюймли ноутбукнинг нархи 999 доллар, 15 дюймлисиники эса 1199 доллардан бошланади.
Изоҳ (0)