Даллас вакиллар суди қўшниси — афроамерикалик Ботэм Жанни отиб ўлдирган собиқ полициячи аёл Эмбер Гайгерга нисбатан ўн йил озодликдан маҳрум этиш жазосини тайинлади, деб ёзади Meduza.
Гайгер муддатидан олдин шартли равишда озод қилиниши учун беш йилдан сўнг даъво қила олади.
Марҳумнинг адвокати Лее Мерритт аёлга нисбатан берилган жазони қилмишга нисбатан енгил деб атаган. Гайгер умрбод қамоқ жазосига ҳукм қилиниши мумкин эди.
Суд мажлиси давомида марҳумнинг укаси Эмбер Гайгерни кечиришини айтган ҳамда уни қучоқлаб қўйган.
Амбер Гайгер 26 яшар афроамерикалик Ботэм Жанни 2018 йил августида ўлдирганди. 15 соатга чўзилган сменадан сўнг уйига қайтган Амбер бу ерда эркак кишини кўриб қолиб, уни босқинчи деб ўйлайди ва отиб ташлайди. Кейин маълум бўлишича, Гайгер қаватларни адаштириб, тасодифан Жаннинг квартирасига кириб қолган.
Эмбер Гайгернинг иши АҚШда қуролсиз афроамерикаликларнинг полиция томонидан бир неча маротаба отиб ташланиши туфайли кенг муҳокамаларга сабаб бўлди.
АҚШда полициячилар томонидан қора танлиларга зуғум ўтказилишига қарши чиқувчи Black Lives Matter ҳаракати фаолият юритади.
Изоҳ (0)