2 октябрь, чоршанба куни Халқ депутатлари Сирдарё вилояти Ширин шаҳар кенгашининг навбатдан ташқари сессияси бўлиб ўтди. Сессияда вилоят ҳокими Ғофуржон Мирзаев, Ўзбекистон Республикаси Президенти Администрацияси шўба мудири Абдулла Турсунов, Ички ишлар вазирининг ўринбосари Рустам Ҳотамов, Бош прокуратура кадрлар бошқармаси бошлиғининг ўринбосари Қаҳрамон Мирсоатов ҳамда Давлат солиқ қўмитаси раиси ўринбосари Мирзиёд Маҳкамов, вилоят ташкилот раҳбарлари, шаҳар ҳокимлиги ходимлари, ташкилот корхона раҳбарлари, маҳалла фуқаролари йиғинлари раислари иштирок этди. Бу ҳақда Сирдарё вилояти ҳокимлиги ахборот хизмати хабар берди.
Вилоят ҳокими Ғофуржон Мирзаев сўзга чиқиб, шаҳарда олиб борилаётган ислоҳотлар, ижтимоий-иқтисодий ҳолатга танқидий баҳо берди.
Сессияда ташкилий масала кўрилган. Бунда 4 та сектор раҳбарлари фаолиятига баҳо берилиб, депутатлар орасида муҳокама қилинди. Шу вақтга қадар Ширин шаҳар ҳокими бўлган Илҳом Бегалиев фаолиятида йўл қўйилган камчиликлари учун эгаллаб турган лавозимидан озод этилди. 2017 йилдан буён Сирдарё вилояти ҳокимлиги саноатни ривожлантириш, капитал қурилиш, коммуникациялар ва коммунал хўжалик масалалари котибияти мудири лавозимида ишлаб келган Абдуғаффор Ҳожиматов Ширин шаҳар ҳокими этиб тасдиқланди.
Абдуғаффор Ҳожиматов 1967 йил Наманган вилояти, Уйчи туманида туғилган, аввал Сирдарё вилояти газ таъминоти бошқармасида фаолият юритган. 2017—2019 йилларда вилоят ҳокимлиги саноатни ривожлантириш, капитал қурилиш, коммуникациялар ва коммунал хўжалик масалалари котибияти мудири лавозимида ишлаб келган.
Чингиз Маҳмудов Ширин шаҳар прокурори, Заҳириддин Собиров Ширин шаҳар Ички ишлар бўлими бошлиғи, Ҳусниддин Қобилов Ширин шаҳар Давлат солиқ инспекцияси бошлиғи лавозимларига тайинланди.
Изоҳ (0)