Тошкентнинг Мирзо Улуғбек туманидаги «Наврўз деҳқон бозори» ҳудудидаги ветеринария-санитария экспертиза лабораторияси ходимларининг ноқонуний ишлари фош этилди. Бу ҳақда Бош прокуратура матбуот хизмати маълум қилди.
Бош прокуратуранинг иқтисодий жиноятларга қарши департаментининг Мирзо Улуғбек тумани бўлими ходимлари томонидан ўтказилган терговга қадар текширишда, «Наврўз деҳқон бозори» АЖ ҳудудидаги ветеринария-санитария экспертиза лабораторияси ходимлари бозор ҳудудида тухум, сут ва сут маҳсулотлари савдоси билан шуғулланиб келаётган тадбиркорларга, лаборатория текширув ўтказмасдан, ҳар куни маҳсулот сифати текширилганлиги тўғрисидаги хулосани бериб келганлиги маълум бўлди.
Шунингдек, улардан ветеринария-санитария экспертизаси ўтказиш қоидаларида кўзда тутилган нормалардан ортиқча маҳсулотлар олиб, 2019 йилнинг август ойига қадар жами 20 500 дона тухум ҳамда сут ва сут маҳсулотларини тамагирлик йўли билан олиб келганлиги аниқланган.
Ушбу ҳолат юзасидан «Наврўз деҳқон бозори» АЖ ҳудудидаги ветеринария-санитария экспертиза лабораторияси ходимларига нисбатан Жиноят кодексининг 214-моддаси (Давлат органи, давлат иштирокидаги ташкилот ёки фуқароларнинг ўзини ўзи бошқариш органи хизматчисининг қонунга хилоф равишда моддий қимматликлар олиши ёки мулкий манфаатдор бўлиши) билан жиноят иши қўзғатилиб, дастлабки тергов ҳаркатлари олиб борилмоқда.
Аввалроқ Андижон вилояти ҳокимлиги томонидан «расмий ҳужжатлар билан тасдиқланган», деб тақдим этилган ҳужжатларининг сохта ва ёлғонлиги фош қилинган эди. Лекин ҳокимлик масъул шахсларининг хатти-ҳаракатига Бош прокуратура муносабат билдирмай келмоқда.
Изоҳ (0)