Фарғона вилояти ҳокимлиги ахборот хизмати «Озодлик» радиосида эълон қилинган «Фарғона ҳокими Шуҳрат Ғаниев тунги селекторга чақиртирган мактаб раҳбарлари аварияда ҳалок бўлди» номли мақолага нисбатан расмий баёнот билан чиқди.
Ёлғон, тахминий, туҳмат ахборот тарқатишнинг «ҳаддини олган» «Озодлик» радиоси Фарғона вилоятида йўл ҳаракати ҳодисаси туфайли икки нафар ҳалок бўлган ва 2 нафар шифохонага тушган Данғара туманидаги мактаб директор ўринбосарлари фожиасини вилоят ҳокими Шуҳрат Ғаниевга боғламоқчи бўлганлар.Аввалроқ, Ички ишлар вазирлиги ижтимоий тармоқларда Фарғона вилояти ҳокимининг тунги селектор йиғилишига кетаётган икки мактаб директори ўринбосари иштирокида содир бўлган ЙТҲ тўғрисидаги хабарларга муносабат билдирган эди.Фарғона вилояти ҳокимлиги йўл-транспорт ҳодисасида ҳалок бўлганлар оила аъзоларига чуқур ҳамдардлик билдиради. Жароҳат олганлар тезроқ соғайиб кетишини тилайди.
Фарғона вилояти ҳокимлиги ахборот хизмати «Озодлик»нинг туҳматчи журналистлари иддао қилаётганидек, 30 сентябрга ўтар кечаси Фарғона вилоят ҳокимлигида ҳеч қандай селектор йиғилиши ўтмаганлигини, бошқа бирон-бир сабаблар билан ҳам ҳеч ким, жумладан, Данғара туманида автоҳалокатга учраган шахслар вилоят ҳокимлигига чақирилмаганини билдиради.
Бу Фарғона вилояти ҳокими Шуҳрат Ғаниевга, давлат бошқарув идораларига қарши ғаразли ниятда атайин уюштирилаётган, Ўзбекистонда ижтимоий-сиёсий вазиятни издан чиқариш, фуқароларнинг норозилигини шакллантиришга қаратилган қабиҳ режанинг амалий ижросидан бўлак нарса эмас.
Шу муносабат билан Фарғона вилояти ҳокимлиги ахборот хизмати мамлакатимиз аҳолиси, интернет, ижтимоий тармоқ фойдаланувчиларини бундай туҳмат ўйинларига ишонмасликка, уларга муносиб жавоб бериб халқимиз бирдамлигини мустаҳкамлашга чақиради.
Фарғона вилояти ҳокимлиги ахборот хизмати
Изоҳ (0)