Ўзбекистоннинг Туркиядаги элчихонаси 23 ёшли Нодира Қодированинг Анқарадаги фожиали ўлими билан боғлиқ вазият назоратга олинганини маълум қилди.
«Анқара шаҳри прокуратураси маълумотига кўра, ҳозирда тергов ҳаракатлари олиб борилмоқда. Хусусан, гувоҳлар сўроқ қилинмоқда, телефон суҳбатлари ва электрон ёзишмалар мазмуни ўрганиляпти», — дейилади Ўзбекистон ТИВ хабарида.
Қайд этилишича, тергов органлари суд-тиббий экспертиза хулосасини кутмоқда. Шунингдек, элчихона ходимлари Туркияда яшайдиган ўзбек диаспораси вакилларининг мазкур масала бўйича саволларига жавоб бераётгани қўшимча қилинган.
Эслатиб ўтамиз, Туркиянинг Адолат ва тараққиёт партияси депутати Ширин Уналнинг уйида 1 йилдан бери ишлаб келаётган 23 ёшли ўзбекистонлик Нодира Қодирова 23 сентябрь куни ўз жонига қасд қилган эди.
Нодира Қодированинг яқинлари марҳуманинг зўрланганини тахмин қилаётган бир пайтда прокурор уни фоҳишаликда гумон қилган.
Ушбу масала Туркия парламенти кун тартибига киритилди. Туркия парламентидаги мухолиф партия депутати Сера Кадигилнинг сўзларига кўра, «жамоатчилик кўнгилсиз ҳодиса ҳукмрон партия депутатининг уйида содир бўлгани боис ёпди-ёпди қилиняпти, деган фикрга бормоқда». У адлия вазирига бир қатор саволлар билан депутатлик сўрови юборган.
Изоҳ (0)