«Фамилиямни Ғанижоновга ўзгартираман шекилли». Фарғона ҳокими Шуҳрат Ғаниев иши ижтимоий тармоқлар муҳокамасида
Фарғона вилояти ҳокими Шуҳрат Ғаниев навбатдаги «қовун»ни туширди: олдида ким бўлишидан қатъий назар, рўмол ўраб олган аёлга кўзи тушса, унинг рўмолини ўша туман ҳокимининг оғзига тиқиб қўйиш билан таҳдид қилди. Бу воқеа тилларда достон бўлиб кетди ва, доимгидай, ижтимоий тармоқларда катта резонансга сабаб бўлди. «Дарё» мавзуга оид қизиқарли мемларни ва муҳокамаларни кўздан кечиради.
Шуҳрат Ғаниев, сиз бугунги гапларингиз билан пичоқни суякка қададингиз. Мен диндор одам эмасман. Абсолют секулярман. Ўзбекистонда ҳар битта рўмолли аёлни потенсиал террорчи деб кўришни бас қилинг. Фарғонадан иккита талаба Сурияга кетмоқчи бўлганига рўмолли аёллар айбдор эмас, сиз айбдорсиз. Қарамагансиз.
Сизнинг мақсадингиз провокация қилишми? Халқни жонидан тўйдиришми? Менинг онам ҳам рўмол ўрайди, нима гапинг бор!? Нимага Ўзбекистон мисқоллаб йиғаётган обрўсини бир тийин қиласизлар?
Айримлар блогерлар имижимизни ёмонлаяпти дебди, мен ўз ватанимнинг содиқ фарзандиман. Унинг имижи халқаро жамиятда яхшиланишини дунё кўрган одам сифатида жуда хоҳлайман. Аслида шу саботажчилар бузмаяптими имижни? Сиздан чарчадик, кетинг. Хатто Анжаннинг «узқара» ҳокимиям хотин кишиларнинг рўмолига аралашиб ўтирмайди.
Шуҳрат Ғаниев тўлиқ истеъфога чиқишини талаб қиламан.
Ҳа айтганча, ушбу расмдаги онахон президентнинг қайноналари экан...
Шуҳрат ака, Канада чегарасигача яхши етиб оласиз деган умиддаман...
Фото: Telegram / Alimoff
Блогер Шаҳноза Тўрахўжаева ҳам мавзуга доир фикрини айтиб ўтди:
Мутлоқ ҳокимият инсонни мутлоқ бузади деган кимдир ҳақ. Мана, Ғаниев, ёрқин мисоли. Унинг тилидан жазосизлик, чексиз ваколатлар, тийилмаслик гапиряпти.
Бу ҳокимбоваларни эшитсанг, Ўзбекистонда суд, қонун деган нарсалар умуман йўқ экан-да деворасан. Истаса сўкади, истаса бузади, истамаса депутат қилмайди, жаҳли чиқса кимнингдир оғзига нимадир тиқади...
Алам қиладигани, давлатга, қонунларга, келажакка халқнинг ишончини орттираман деб қанча ақллар бош қотиради, мисқоллаб обрў йиғилади, қадамлаб ишонч қозонилади. Кейин бир ҳокими мутлақ чиқиб жазавага тушади ва яна бошланғич нуқтага қайтамиз.
Бу Сизиф меҳнатига ўхшайди, биз одам бўлмаймиз деган хулосага айлантириб олиб келаверади...
Сиёсатни тўғри тушунтиролмасанг, қум еб «сиёсат» қиласанми дейдиган мард йўқ ҳокими мутлақнинг ёнида. Умуман, бутун Ўзбекистонда топилармикан?
Қачон бу ҳокимларнинг мушугини пишт дейишади? Ҳаддидан ошган ҳар кимга чегарани кўрсатишади, буларга-чи? Ҳокимларнинг ваколатларини чеклаб, тийиб турадиган механизмларни кучайтириш керак. Бу анчадан бери айтиляпти. Аммо қачон қилинади?
Одамлар бунақа «нутқ»лардан кейин ислоҳотларга ҳам, раҳбарларга ҳам, келажакка ҳам ишонмай қўяпти. Наҳотки Ғаниев шу ишончдан ҳам азизроқ кадр бўлса?
Ё биз демократик давлат бўлиб ривожланамиз, ё одамларнинг сабр косаси тўлади. Ва бунда Ғаниевдек амалдорларнинг ҳиссаси катта бўлади!
«...эшитиб олинглар. Бирортанг мажлис қилсанг, мен борсам, ўша кийимда ўтирган аёл кишини кўрсам, маҳалла раисими у, ўқитувчими у, жамоатчими у, депутатми у — ўша рўмолини олиб оғзингга тиқиб қўяман», — деганмиди Фарғона ҳокими Шуҳрат Ғаниев?!
Мана бу суратда мажлис ўтказаётган ким? Шунда мана бу аёлнинг рўмоли кимнинг оғзига тиқиб қўйилиши керак? Шуҳрат Мадаминович, сиз ҳам шунақа ўйлаяпсизми — айтган гапларингиз тутуриқсиз ва бир лаҳзада бир чақага айланиб қолишини, шунда қўлингиздан ҳар доимгидек блокнотингизга ёзишдан ортиқ иш келмаслигини тушуняпсизми?
Охир-оқибат, муаммо фақат шу ҳокимнинг ўзида, сўзидами — ахир у бор-йўғи ижрочи эмасми? Бир йил аввалги шу суратда шамоллар қаердан эсаётганди-ю, энди, бир йил ўтиб, қаердан эсяпти (эсяптими ўзи?) — муаммо шу томонларда яширин эмасмикин?
Бу хабардан сўнг Twitter’чилар жонланиб, ўзига хос ҳазиллар қилишди.
Скрин: «Дарё»
Скрин: «Дарё»
Скрин: «Дарё»
Тушдан сўнг Олий Мажлис Сенатининг Регламент ва одоб комиссияси йиғилиши бўлиб ўтди. Унда Фарғона вилояти ҳокими, сенатор Шуҳрат Ғаниевнинг ижтимоий тармоқларда тарқалган аудиоси – соқол, рўмол ва иш жойларида намозга қарши чиқиб, бунга бўйсунмаганларни қамаш билан таҳдид қилгани муҳокама қилинди. Сенат комиссияси йиғилишида Танзила Норбоева Шуҳрат Ғаниевни танқид қилиб, унга қатъий огоҳлантириш берди.
«Мен ҳар қандай жазога тайёрман, ‘ўтиниб-ўтиниб’ кечирим сўрайман! Менинг авлодим, ота-онам миллий либос кияди. Ўзим ҳам уйимда миллий либос кияман. Мен айбдорман. Айбимни тан оламан. Минг бор узр», – деди Шуҳрат Ғаниев.
Йиғилиш ҳокимнинг Сенат томонидан қаттиқ огоҳлантирилиши ва уч ой синов муддати берилиши билан якунланди.
Бундай «юмшоқ» жазодан норози ижтимоий тармоқ фойдаланувчилари ўз аватарларини Шуҳрат Ғаниев кулиб тушган суратига оммавий алмаштиришни бошлади. Бу флешмобни қатор йирик блогер ва Telegram-канал эгалари қўллаб-қувватлади.
Скрин: «Дарё»
Ўз навбатида, «Асанов формати» канали Шуҳрат Ғаниев аслида блогерларга ёрдам бераётгани ҳақида ҳазил пост қолдирди:
Блогерлар ўзаро келишган ҳолда Фарғона вилояти ҳокими Шуҳрат Ғаниевга уларнинг каналларида аудитория тўплашга ёрдам бергани учун «Telegram эътирофи» медалини топширишга қарор қилди.
IV. Масалани ижобий якун билан президент тугатиб берди
Кўксаройда 30 сентябрь куни ўтказилган бокс бўйича жаҳон чемпионати совриндорларига давлат мукофотларни топшириш маросими вақтида президент Ўзбекистонда рўмолга ҳеч ким ҳеч қачон тақиқ қўймаслигини маълум қилди.
Ижтимоий тармоқларда турли масалалар кўтариляпти.
Қандай ярашади ўзбекона рўмоллар. Қандай ярашади ўзбекона кийинишларимиз. Шу туришингиз муқаддас ўзбек онаси тимсоли. Меҳрли онамиз, сингилларимиз мана шундай юришига ҳеч ким ҳеч қачон қарши бўлмайди Ўзбекистонда.
Мана ҳаммамизнинг бувиларимиз ўтган, ҳаёт оналаримиз бор, уларнинг кийинишига қараб ҳаммамиз ҳавас қиламиз, мен ҳам сиз билан мана шундай ўғил тарбиялаганингиз учун, сиз билан самимий кўришганимдан бахтиёрман. Сиз бахтиёр онасиз, мен бахтиёр президентман сиз орқали
Изоҳ (0)