Аввалроқ, Андижон шаҳридаги хусусий мактаблардан бирининг 82 нафар ўқувчиси овқатдан заҳарлангани ҳақида хабар берилганди. Маълум бўлишича, овқатдан заҳарланганлар «Zahiriddin Muhammad Bobur Universal Academy» номли нодавлат таълим муассасаси ўқувчилари бўлиб, қолган 3 нафари ўқитувчи ва 4 нафари техник ходим. Бу ҳақда Бош прокуратура «Дарё»га маълум қилди.
Мазкур ҳолат юзасидан дастлабки ўрганишлар давомида, РШТТЙМ Андижон филиали, вилоят кўп тармоқлар болалар шифохонаси ва вилоят юқумли касалликлар шифохонасига мурожаат қилганлардан 3 нафар ўқувчининг аҳволи ўртача оғир ҳолатда бўлиб, 76 нафар ўқувчи, 3 нафар ўқитувчи, 4 нафар техник ходим стационар тартибда даволанаётганлиги ҳамда 3 нафар ўқувчига биринчи тез тиббий ёрдам кўрсатилиб, уйларига кетишга рухсат берилганлиги ва ҳозирда стационар тартибда даволанаётган беморларнинг аҳволи яхшиланганлиги сабабли уларнинг уйларига кетишларига рухсат бериш мумкинлиги маълум қилинди.Воқеа жойига вилоят прокурори Ғайратжон Фозилов, вилоят прокурорининг биринчи ўринбосари К.Йўлбарсов, Андижон шаҳар прокурори Қ.Асқаров, шаҳар прокуратураси терговчиси, шаҳар ИИБ бошлиғи ва тезкор-тергов гуруҳи ходимлари чиқди.
Муассасада 236 нафар ўқувчи таҳсил олаётган бўлиб, тарбияланувчиларга эрталабки нонушта учун «Манний бўтқаси», соат 11:45 ларда тушлик учун биринчи таом сифатида «Нўхат шўрва», иккинчи таом сифатида «Уйғур лағмон» берилганлиги аниқланиб, ушбу таомлардан текшириш учун намуналар олинди.
Ҳозирда терговга қадар текширув ҳаракатлари Андижон шаҳар прокуратураси томонидан олиб борилмоқда. Терговга қадар текширув жараёни вилоят прокуратураси томонидан назоратга олинган. Натижаси юзасидан қўшимча ахборот берилиши маълум қилинди.
Изоҳ (0)