2023 йилга келиб Туркия йилига 75 миллиондан ортиқ туристни қабул қилиш ва саёҳатлар индустриясида 65 миллиард доллар ишлаб олишни режалаштирмоқда. Бу ҳақда «РИА Новости» хабар бермоқда.
Мамлакат маданият ва туризм вазири Мехмет Эрсой асосий мақсади сайёҳлар оқимини икки баравар кўпайтириш бўлган Туркияда туризм стратегиясини тақдим этди.
Бунинг учун расмийлар мамлакатда бадавлат сайёҳларни жалб этмоқчи. Улар учун янги туристик маҳсулотлар ишлаб чиқилмоқда. Жумладан, гастрономик лойиҳа ва йўналишлар алоҳида бренд остида илгари сурилади.
Соғломлаштириш ва тиббий туризмга алоҳида этибор берилади. Шунингдек, велотуризмни ривожлантириш учун махсус йўлаклар ва йўналишлар, велосипедчилар учун меҳмонхоналар очилиши кўзда тутилган. 2023 йилга келиб бундай объектлар сони 100 тадан 1500 тага етади.
Экологик туризмни ривожлантирадиган минтақа ва курортлар давлат томонидан қўллаб-қувватланади. Green Star сертификатига эга меҳмонхоналар ва «мовий байроқ» билан тақдирланган пляжлар сонини учдан бирга кўпайтириш стратегик жиҳатдан муҳим деб топилди.
Меҳмонлар жойлашадиган манзиллар сонини кўпайтиришга ҳам эътибор қаратилади. Вазирга кўра, 4 йилдан сўнг Туркияда 2,5 миллион меҳмонхона ўрни бўлади.
Маълумот учун, ҳозир Туркия туристлар сони бўйича дунёда 6-ўринда туради. Ўтган йили мамлакатга хориждан 39,5 миллион сайёҳ келган.
Изоҳ (0)