Хитой парадда энг янги қитъалараро баллистик ракетани намойиш этди

Хитой Халқ Республикаси ташкил топганининг 70 йиллигига бағишланган ҳарбий парадда Пекин энг янги DF-41 («Дунфэн-41», «Шарқ шамоли») қитъалараро баллистик ракетани намойиш этди. Бу ҳақда «РИА Новости» хабар бермоқда.

Хитой 1 октябрь куни ўз тарихи давомида энг йирик парад ўтказмоқда. Унда Хитой Халқ озодлик армиясидан қарийб 15 минг аскар, 580 дона техника, 160 самолёт ва вертолётлар жалб этилган. Парадда Хитой Халқ Республикаси раиси Си Цзиньпин иштирок этмоқда.

Ракетанинг кенг оммага намойиши 2009 йилдаги парадда кутилган, бироқ бу рўй бермаган эди. Қаттиқ ёқилғи билан ишлайдиган уч поғонали DF-41’ни ишлаб чиқариш Хитойда 1980 йилларда бошлаб юборилган, ракетани синовдан ўтказиш 2012 йилда амалга оширилган.

DF-41 турли манбалар маълумотларига кўра, 12 мингдан 14 минг километргача бўлган масофага уча олади. У 6 тадан 10 тагача манёврни амалга оширувчи алоҳида бош қисмларни таший олади ва айнан шу жиҳат уни тутиб олишни қийинлаштиради. Ракета узунлиги 21 метрга етади, корпус айланаси эса 2,2—2,5 метрни ташкил этади.

Ракетани ер устидаги ҳамда темир йўлдаги ҳаракатланувчи платформа, шахтадаги ишга тушириш мосламалари орқали учириш мумкин. Турли манбалар маълумотларига кўра, нишонга олиш аниқлиги 100 дан 500 метргача масофани ташкил этади.

AP’нинг хабар беришича, янги баллистик ракета АҚШ ва унинг иттифоқдошлари томонидан кенг йўлга қўйилган барча ракеталарга қарши қалқонларни тешиб ўтишга қодир.