Олий Мажлис Сенатининг Регламент ва одоб комиссиясининг 30 сентябрь, душанба куни бўлиб ўтган йиғилишида Сенатор Толибжон Мадумаров аввал ҳам Шуҳрат Ғаниев ҳақида тармоқларда гап-сўзлар тарқалганини эслатди, дея хабар бермоқда «Дарё» мухбири Мусулмонбек Иброҳимов.
«Шуҳрат Мадаминовичнинг ижтимоий тармоқларда тарқалган гаплари сенатор сифатида ҳам, ҳудуд раҳбари сифатида ҳам тақсинга лойиқ эмас, қоралайдиган иш. Бундан аввал ҳам Шуҳрат Мадаминович ҳақида тармоқларда гап-сўзлар чиққан. Тошлоқ ёки Риштонда бўлиб ўтган воқеалар раҳбарга ибрат бўлиши керак эди», — деди сенатор.
Мадумаров ҳокимнинг муҳокамаларга сабаб бўлган гапларини мақулламаслигини билдирди ва Сенат раисидан Шуҳрат Ғаниевга нисбатан чора кўришни талаб қилди.
Эслатиб ўтамиз, Фарғона вилояти ҳокими Шуҳрат Ғаниев 2018 йили Ақтўбеда юз берган фожиа ва унинг оқибатлари муҳокамасига бағишланган селектор йиғилиши ўтказган ва йиғилиш давомида Тошлоқ тумани аҳолисини «ҳароми» деб атаб, уларнинг Ҳажга боришини тақиқлаганди. 2019 йил 2 август куни Президент раислигида ўтказилган видеоселекторда Шавкат Мирзиёев «снос»лар масаласига алоҳида тўхталиб, Хоразм, Қашқадарё вилоятлари ҳокимлари билан бирга Фарғона вилояти ҳокими Шуҳрат Ғаниевнинг ишларини «хиёнат» деб баҳолади. Президент Ўзбекистонни бутун дунёга шарманда қилаётган вилоят ҳокимларига чора кўришни бош вазир Абдулла Арипов ва Президент администрацияси раҳбари Зайнилобиддин Низомиддиновга топширган эди. Якунда ушбу вилоят раҳбарлари ишончни оқлаши учун йил охиригача имкон берилган эди.
Фарғона вилояти ҳокими соқол, рўмол ва иш жойларида намозга қарши чиқиб, бунга бўйсунмаганларни қамаш билан таҳдид қилганди. Ушбу масалага бағишланган комиссия йиғилишида сўз олган сенатор Толибжон Мадумаровнинг айтишича, раҳбар гапидан халққа ва ўзига қандай наф келтиришини ўйлаши керак.
Йиғилиш сўнгида Олий Мажлис Сенатининг Регламент ва одоб комиссияси ҳоким Ғаниевни қаттиқ огоҳлантирди ва 3 ой синов муддати берди.
Изоҳ (0)