Олдинроқ Қашқадарёнинг Китоб туманидаги Варганза қишлоғида Биринчи халқаро анор фестивали иш бошлаганини маълум қилган эдик. 28 сентябрь, шанба куни фестивалнинг асосий тадбирлари Варганза қишлоғида бўлиб ўтди.
Дастлаб меҳмонлар Китобнинг диққатга сазовор жойлари, хусусан, Ҳазрат Башир зиёратгоҳи билан танишди.
Шундан сўнг Тошкентдан ташриф буюрган катта делегация Варганзага йўл олди.
У ерда варганзаликлар ўз уйларида ўзига хос кичик кўргазмалар ташкил этиб, меҳмонларни кутиб олди.
Кейин Варганзада биринчи агротуристик қишлоқнинг очилиш маросими бўлиб ўтди. Агротуристик қишлоқнинг рамзий калити Варганза қишлоғи раисига топширилди.
Туман ҳокими, туман ва вилоят даражасидаги амалдорларнинг чиқишидан сўнг концерт дастури уюштирилди. Шунингдек, меҳмонлар учун турли ўйинлар ташкил этилди. Жумладан, меҳмонларга анорзорга кириб, энг катта анорни топиб, узиб келиш топширилди. Узилган анорлар орасидан қишлоқ оқсоқоллари энг каттасини саралаб олди. Мазкур анор кимошди савдосига қўйилди. Савдодан тушган 50 доллар пул Варганзада 28 сентябрда туғиладиган биринчи болага совға қилинадиган бўлди.
Изоҳ (0)