Oldinroq Qashqadaryoning Kitob tumanidagi Varganza qishlog‘ida Birinchi xalqaro anor festivali ish boshlaganini ma’lum qilgan edik. 28-sentabr, shanba kuni festivalning asosiy tadbirlari Varganza qishlog‘ida bo‘lib o‘tdi.
Dastlab mehmonlar Kitobning diqqatga sazovor joylari, xususan, Hazrat Bashir ziyoratgohi bilan tanishdi.
Shundan so‘ng Toshkentdan tashrif buyurgan katta delegatsiya Varganzaga yo‘l oldi.
U yerda varganzaliklar o‘z uylarida o‘ziga xos kichik ko‘rgazmalar tashkil etib, mehmonlarni kutib oldi.
Keyin Varganzada birinchi agroturistik qishloqning ochilish marosimi bo‘lib o‘tdi. Agroturistik qishloqning ramziy kaliti Varganza qishlog‘i raisiga topshirildi.
Tuman hokimi, tuman va viloyat darajasidagi amaldorlarning chiqishidan so‘ng konsert dasturi uyushtirildi. Shuningdek, mehmonlar uchun turli o‘yinlar tashkil etildi. Jumladan, mehmonlarga anorzorga kirib, eng katta anorni topib, uzib kelish topshirildi. Uzilgan anorlar orasidan qishloq oqsoqollari eng kattasini saralab oldi. Mazkur anor kimoshdi savdosiga qo‘yildi. Savdodan tushgan 50 dollar pul Varganzada 28-sentabrda tug‘iladigan birinchi bolaga sovg‘a qilinadigan bo‘ldi.
Izoh (0)