26 сентябрь куни Тошкентда «Хотин-қизларнинг ижтимоий-иқтисодий ва сиёсий соҳалардаги мавқейини кучайтириш» мавзусида икки кунлик форум бўлиб ўтди. Бу ҳақда Олий Мажлис Сенати матбуот хизмати «Дарё»га маълум қилди.
Ўзбекистон Хотин-қизлар гендер тенглигини ҳимоя қилиш бўйича комиссияси, Олий Мажлис Сенатининг Хотин-қизлар ва гендер тенглик масалалари қўмитаси, Хотин-қизлар қўмитаси томонидан Ўзбекистондаги Европа хавфсизлик ва ҳамкорлик ташкилоти лойиҳалари мувофиқлаштирувчиси офиси билан ҳамкорликда ташкил этилган форумда сенаторлар, депутатлар, вазирликлар ва идоралар раҳбарлари, нодавлат нотижорат ташкилотлари, шунингдек, ОАВ вакиллари қатнашди.
Форум давомида оила бузилишининг олдини олиш, жамиятда оила мақомини мустаҳкамлаш масалалари муҳокама этилди. Шу муносабат билан нодавлат нотижорат ташкилотларининг бу борадаги амалий иш тажрибаси батафсил кўриб чиқилди ва таҳлил қилинди.
Тегишли кўникма ва қобилиятга эга фаол хотин-қизларни раҳбар лавозимларига тайёрлаш, ишбилармон аёлларни ҳар томонлама қўллаб-қувватлаш, айниқса, оилавий тадбиркорликни ривожлантириш масалалари ҳам муҳокама этилди. Хотин-қизларга нисбатан жиноят кўрсаткичларини камайтириш чораларига ҳам алоҳида эътибор қаратилди. Шу муносабат билан фуқаролар орасида профилактика ва тушунтириш ишларини фаоллаштириш муҳимлиги қайд этилди.
Имкониятлари чекланган хотин-қизларнинг ижтимоий фаоллигини ошириш ҳақида сўз борганда бундай тоифадаги аёллар билан ишлашда психологик ёрдам бериш ва қўллаб-қувватлаш муҳим эканлиги қайд этилди. Бунда улар учун ижтимоий шарт-шароитни яхшилаш ва улар бандлигини таъминлаш имкониятлари батафсил муҳокама қилинди.
Изоҳ (0)