Эндиликда овоз бериш сайлов куни соат 8:00 дан 20:00 гача ўтказилади. Бу ҳақда 27 сентябрь куни Марказий сайлов комиссияси бўлим бошлиғи Фарҳоджон Насриддинов журналистлар учун сайловни ёритиш масалаларига бағишланган семинарда айтиб ўтди, дея хабар бермоқда «Дарё» мухбири Мусулмонбек Иброҳимов.
Семинарда Сайлов кодексига киритилган қўшимчалар ва ўзгартиришлар ҳақида маълумот берилди. Фарҳоджон Насриддиновнинг маълум қилишича, сайловларда овоз бериш вақти икки соатга қисқарган.
«Аввал сайловларимизда овоз бериш соат 6:00 дан 20:00 гача ўтказилган бўлса, Сайлов кодексига мувофиқ энди овоз бериш вақти соат 8:00 дан соат 20:00 гача этиб белгиланди», — деди Марказий сайлов комиссияси вакили.
Сайлов кодексининг 51-моддасига кўра, овоз бериш вақти ва жойи тўғрисида участка сайлов комиссияси сайловчиларни сайловдан камида ўн кун олдин хабардор қилади.
Маълумот учун, 22 декабрда Олий Мажлис Қонунчилик палатаси ва маҳаллий кенгашларга сайловлар бўлиб ўтади. 20 сентябрдан сайлов кампаниясига старт берилган, 24 сентябрь куни эса сайловларда қатнашадиган беш партия — Тадбиркорлар ва ишбилармонлар ҳаракати – Либерал-демократик партия, «Адолат» социал-демократик партияси, «Миллий тикланиш» демократик партияси, Халқ демократик партияси ҳамда Экологик партиянинг ваколатли вакиллари рўйхатга олиниб, уларга сайловчиларнинг имзоларини тўплашлари учун белгиланган намунадаги имзо варақалари топширилган.
Изоҳ (0)