Буюк Британия бош вазири Борис Жонсон қиролича Елизавета II га парламент фаолиятини 5 ҳафтага тўхтатишни таклиф қилиб, қонун бузилишига йўл қўйган. Мамлакат олий суди шундай тўхтамга келди, дея хабар беради Meduza.
Суд Жонсоннинг тавсиясини «ноқонуний, фойдасиз ва самарасиз» деб топди. 11 нафар судья парламент жорий сессиясини тўхтатиб қўйиш ҳақидаги қарор бекор қилиниши керак деган хулосага келган.
Борис Жонсоннинг рақиблари бош вазир депутатларга Буюк Британиянинг Евроиттифоқдан келишувсиз чиқишини блоклашига тўсқинлик қилиш учун парламент ишини тўхтатишга қарор қилган деб ҳисоблади.
Мазкур қарор туфайли Лондон ва бошқа шаҳарларда норозилик намойишлари бўлиб ўтди, 1,7 миллиондан ортиқ киши бош вазирнинг қарорига қарши петицияни имзолади.
Сўнгги хабарларга кўра, Британия парламентининг қуйи палатаси 25 сентябрь куни эрталабдан ўз ишини тиклайди. Бу ҳақда палата спикери Жон Беркоу маълум қилган.
Изоҳ (0)