Футбол бўйича Ўзбекистон терма жамоаси бош мураббийи Эктор Купер лавозимидан озод этилди.
Ўзбекистон футбол ассоциацияси хабарига кўра, томонлар ўзаро шартномани бекор қилиш бўйича келишувга эришган.
Маълумот учун, Купер билан 2018 йилнинг 1 августидан 2021 йилнинг 30 ноябригача, ЖЧ—2022 саралаш цикли учун шартнома тузилганди ва агар терма жамоа Қатарда ўтказиладиган мундиалга йўлланма олса, шартнома автоматик тарзда турнир якунигача узайтирилиши назарда тутилганди.
Бир муддат аввал Купер билан имзоланган шартномага кўра, у агарда ишдан бўшатиладиган бўлса 7 миллион евро компенсация олиши кераклиги ҳақида ёзилганди. ЎФА эса фақат 5 миллион беришга розилиги таъкидланди. Маълум бўлишича, аргентиналикнинг йиллик маоши 2 миллион еврони ташкил этган.
Эслатиб ўтамиз, аввалроқ ташкилот расмий вакиллари билан «Дарё» боғланганда Купернинг истеъфога чиқарилиши ва унинг ўрнига Вадим Абрамовнинг олиб келиниши «шунчаки гап-сўз» дея таърифланганди.
Эктор Купернинг Ўзбекистон терма жамоаси бошқарувидаги умумий статистикаси:
- Ўйинлар сони: 17 та
- Ғалаба: 7 та
- Дуранг: 4 та
- Мағлубият: 6 та
- Тўплар нисбати: 19-16
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)