Futbol bo‘yicha O‘zbekiston terma jamoasi bosh murabbiyi Ektor Kuper lavozimidan ozod etildi.
O‘zbekiston futbol assotsiatsiyasi xabariga ko‘ra, tomonlar o‘zaro shartnomani bekor qilish bo‘yicha kelishuvga erishgan.
Ma’lumot uchun, Kuper bilan 2018-yilning 1-avgustidan 2021-yilning 30-noyabrigacha, JCh—2022 saralash sikli uchun shartnoma tuzilgandi va agar terma jamoa Qatarda o‘tkaziladigan mundialga yo‘llanma olsa, shartnoma avtomatik tarzda turnir yakunigacha uzaytirilishi nazarda tutilgandi.
Bir muddat avval Kuper bilan imzolangan shartnomaga ko‘ra, u agarda ishdan bo‘shatiladigan bo‘lsa 7 million yevro kompensatsiya olishi kerakligi haqida yozilgandi. O‘FA esa faqat 5 million berishga roziligi ta’kidlandi. Ma’lum bo‘lishicha, argentinalikning yillik maoshi 2 million yevroni tashkil etgan.
Eslatib o‘tamiz, avvalroq tashkilot rasmiy vakillari bilan “Daryo” bog‘langanda Kuperning iste’foga chiqarilishi va uning o‘rniga Vadim Abramovning olib kelinishi “shunchaki gap-so‘z” deya ta’riflangandi.
Ektor Kuperning O‘zbekiston terma jamoasi boshqaruvidagi umumiy statistikasi:
- O‘yinlar soni: 17 ta
- G‘alaba: 7 ta
- Durang: 4 ta
- Mag‘lubiyat: 6 ta
- To‘plar nisbati: 19-16
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)