Ўзбекистон Республикаси Монополияга қарши курашиш қўмитаси «Ўзстандарт» агентлигига истеъмолчилар ҳуқуқларини ҳимоя қилиш юзасидан қўшимча чора-тадбирлар кўриш тўғрисидаги Вазирлар Маҳкамасининг қарори лойиҳасининг бир қатор бандларини қайта кўриб чиқишни тавсия қилди. Бу ҳақда «Gazeta.uz» хабар берди.
«Ўзстандарт» агентлиги томонидан тайёрланган ҳужжат жорий йилнинг 19 сентябрида муҳокамага қўйилган ва унда ташкилотнинг бир неча таклифлари мавжуд.
Жумладан, белгиланган тегишли миллий белгисига эга бўлмаган маҳсулотлар сотувини тақиқлаш. Сертификациядан ўтказилиши мажбурий бўлган маҳсулотлар рўйхати 102 банддан иборат, уларнинг ҳар бирида бир нечта товар қайд этилган;аввал ишлатилган автомобиль ва қишлоқ хўжалиги шиналари, автотранспорт воситаларининг эҳтиёт қисмлари, текстиль ва енгил саноат ҳамда маиший электротехника импортини тақиқлаш;мамлакат ҳудудида биттадан кам бўлмаган сервис марказлари бор ишлаб чиқарувчи заводлар (расмий дилерларга) энергия сарфига мўлжалланган маҳсулотларни олиб кириш рухсат этилади. Ушбу тартиб татбиқ қилинадиган электротехника воситалари рўйхатига: музлатгичлар, вентиляторлар, кондиционерлар, идиш-товоқ ва кир ювиш машиналари, чангютгичлар, уяли алоқа воситалари ва бошқалар кирган.
Агар қарор лойиҳаси маъқулланса, янги қоидалар 2020 йилнинг 1 январидан кучга киради.
«Қарор билан жисмоний ва юридик шахслар ҳамда тадбиркорлик субъектларининг фаолиятида улар манфаатларига хизмат қилувчи ва жамиятда рақобатнинг ривожлантирилишига сабаб бўлувчи масалалар ҳал этилади», — дейилади Монополияга қарши курашиш қўмитасининг хабарида.
Қўмита ҳужжат лойиҳасидан сервис марказларига эга электротехника товарларини мамлакатга олиб кириш бўйича бандни олиб ташлашни таклиф қилди. Бундай чора-тадбирлар ишлаб чиқарувчи заводнинг қўшимча маблағ сарфлашига, бозордаги иштирокчилар сонининг қисқаришига, шунингдек, истеъмолчилар манфаатларига зид келади.
Шунингдек, «Ўзстандарт» ишлаб чиққан Ҳукумат лойиҳасига кўра, муайян турдаги маҳсулотни сертификациялаш вақтида акрредитациядан ўтган тажриба лабораторияси (маркази) бўлмаган тақдирда сертификация органи томонидан имкониятлар, тажрибалар ўтказиш жойи ва вақти белгиланади ҳамда натижаларнинг объективлиги таъминланади.
Қўмита вакилларининг фикрича, тажрибалар лабораториясининг сертификация органи томонидан танланиши, шунингдек, буюртмачи иштирокисиз тажриба шартларининг белгиланиши коррупцияга олиб келиши мумкин. Қўмита сертификация органининг тажрибалардаги иштироки шартлари ва жойи буюртмачи билан келишилган ҳолда амалга оширилиши лозим деб ҳисобламоқда.
Лойиҳа юзасидан тавсиялар «Ўзстандарт» агентлигига юборилган, дейилади Монополияга қарши курашиш қўмитаси хабарида. Ҳужжат лойиҳаси 3 октябрга қадар муҳокама қилинади.
Изоҳ (0)