Англия Премьер Лигаси 6-турининг марказий учрашувида 22 сентябрь, якшанба куни «Челси» Лондонда «Ливерпуль»га қарши баҳс олиб боради.
Бугун лондонликлар клуби Англия чемпионати ушбу мавсумида тўхташ нималигини билмай келаётган «қизиллар»ни таслим этишга уриниб кўради. Икки жамоа мавсум аввалида УЕФА Суперкубоги учун баҳс олиб борди. Ўшанда Фрэнк Лэмпард жамоаси ёмон кўринмади ва кучли рақибга қарши муносиб ҳаракат қилди. Бироқ бу сафар ҳам ўша ўйинни кўрсатиш учун «кўклар»га кадрлар муаммоси халал бериши мумкин.
2000 йилнинг апрелидан шу вақтга қадар бу икки жамоа ўзаро 60 марта тўқнаш келган. Бу XXI асрда энг кўп кузатилган инглиз клублари баҳси ҳисобланади.«Челси»
Премьер Лигани «Манчестер Юнайтед»га қарши ўйиндаги йирик мағлубият билан бошлаган «аристократлар»га барқарорлик етишмаяпти. Лэмпард ишга киришиши биланоқ бир нечта футболчиларни кашф қилишга улгурди: Тэмми Абраҳам, Мэйсон Маунт каби ёш иқтидор эгалари жамоанинг асосий таркиб футболчисига айланди. Бироқ жамоада муаммолар ҳам етарли даражада. ФИФА тақиқи сабаб ёзги трансфер ойнасида харидларни амалга ошира олмаган клуб ҳимоя чизиғида муаммолар сезмоқда. Бундан ташқари Эден Азарнинг кетиши ҳам ўз таъсирини ўтказмай қолмади.
«Челси» 1988/89 йилги мавсумдан кейин илк бор мавсум стартидаги учта уй учрашувида ғалабага эриша олмади, ўшанда жамоа иккинчи дивизионда тўп сурарди. «Челси»га бугун Рубен-Лофтус Чик ёрдам бера олмайди, шунингдек, Мэйсон Маунт, Нголо Канте ва Антонио Рюдигер каби футболчиларнинг ҳам майдонга тушиши сўроқ остида турибди.«Ливерпуль»
Англияда мавсумни юқори нотада бошлаган Юрген Клопп шогирдлари Чемпионлар Лигаси 1-туридан ўрин олган «Наполи»га қарши ўйинда мағлубиятни қабул қилиб олди (0:2). «Челси»нинг собиқ устози Карло Анчелотти мусобақанинг амалдаги чемпионини тўхтатишнинг уддасидан чиқди. Бироқ мерсисайдлар АПЛ ўйинларига доим ўзгача иштиёқ билан қарайди. Салоҳ—Фирмино—Мане триоси эса ҳар қандай жамоани қўрқувга солишга қодир.
«Ливерпуль» бу ўйиндаги ғалаба орқали кетма-кет икки мавсум стартини олтита ютуқ билан бошлаган илк клубга айланиши мумкин. Бироқ ўтган йили «қизиллар»нинг муваффақиятли старти айнан «Челси»га қарши ўйинда (1:1) тўхтаганди. Шунингдек, бугун «Ливерпуль» лигадаги ғалабали сериясини 14 тага етказган ҳолда рекорд қайд этиши мумкин.
Клопп бугун Алиссон, Натаниэл Клайн ва Дивок Ориги хизматидан фойдалана олмайди.Статистика ва қизиқарли фактлар
- «Челси» «Ливерпуль»га қарши АПЛдаги сўнгги тўққизта ўйиннинг бор-йўғи биттасида ғалабага эриша олган (5 дуранг, 3 мағлубият)
- «Ливерпуль» Премьер Лигада 14 та учрашувдан буён ҳар бир ўйинда камида иккита гол урмоқда
- «Ливерпуль» «Стемфорд Бриж»даги сўнгги 11 ўйиннинг бештасида ғалабага қозонган, бироқ жамоа 2016 йилнинг сентябридан буён Лондонда уч очко қўлга кирита олмаган
- «Кўклар» «Ливерпуль»га қарши кечган охирги 20 та ўйиннинг фақат биттасида гол ура олмаган
- «Челси» шу вақтга қадар биринчи ўринда турган жамоани 18 марта мағлубиятга учрата олган ва бу борада АПЛда етакчи ҳисобланади
- «Ливерпуль» Премьер Лиганинг сўнгги 44 та ўйинида бор-йўғи бир бор мағлубиятга учради (36 ғалаба, 7 дуранг)
- «Ливерпуль» кучли олтилик клублари билан сўнгги 12 та ўзаро ўйинда фақат битта ғалабага эришган
АПЛ
6-тур баҳси
22 сентябрь, якшанба, 20:30
«Челси» — «Ливерпуль»
Тахминий таркиблар
«Челси» (3-5-1) — Кепа, Томори, Кристенсен, Зума, Алонсо, Аспиликуэта, Жоржиньо, Ковачич, Виллиан, Педро, Абраҳам.
«Ливерпуль» (4-3-3) — Адриан, Александр-Арнольд, Матип, ван Дейк, Робертсон, Фабиньо, Вейналдум, Ҳендерсон, Салоҳ, Мане, Фирмино.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)