UNICEF ва Соғлиқни сақлаш вазирлиги Наманганда замонавий совутгичлар билан жиҳозланган вакциналар омборхонасини ишга туширди. Бу ҳақда «Дарё» мухбири Азизбек Абдувалиев хабар бермоқда.
Янги вакциналар омбори бир ёшгача бўлган 65 мингдан ортиқ болани эмлашга мўжалланган 12 хил турдаги 31 100 литр вакцинани сақлаш имконини беради. Ичига кириб юриш мумкин бўлган совутгич камералари вакциналар сифати учун зарур бўлган 2—8 даража ҳароратни доимий равишда таъминлаб туради.
UNICEF’нинг Ўзбекистондаги ваколатхонаси раҳбари Саша Грауманн янги объектни вилоят давлат санитария-эпидемиология назорати маркази бош шифокори Рустам Ҳамроқуловга топширди.
—Ўзбекистонда болаларни касалликка қарши эмлаш қамрови жуда юқори. Уларни хавфли хасталиклардан ишончли ҳимоя қилиш учун бу кўрсаткични сақлаш муҳим омил ҳисобланади. Наманган вилоятида янги омборхонанинг ишга туширилиши ушбу вазифани амалга оширишда ёрдам беради, — деди Саша Грауманн тадбирдаги чиқиши чоғида.
Вилоят ДСЕНМ иммунопрофилактика бўлими бошлиғи Шерзод Латифжоновга кўра, ҳозирда Тўрақўрғон, Чуст ва Чортоқ туманларида ҳам шундай вакциналар сақлаш омборлари қурилган. Йил охиригача Норин ва Наманган туманларида янги омборларни ишга тушириш режалаштирилган. Келгусида шаҳар-туманларга вакциналарни етказиб бериш учун махсус авторефрижераторлар харид қилиниши кўзда тутилмоқда.
Маълумот учун, UNICEF ва GAVI (Вакциналар ва иммунизация бўйича глобал алянс) ташкилоти томонидан Ўзбекистонга ажратилган 22 миллион долларлик грант ҳисобидан Қорақалпоғистон Республикаси, Тошкент шаҳри ва барча вилоятларда жами 21 та вакцина сақлаш омборхонасини қуриш ва уларни жиҳозлаш белгиланган. Мазкур объектлар Шарқий Европа ва Марказий Осиёда энг яхшилари ҳисобланади.
Изоҳ (0)