UNICEF va Sog‘liqni saqlash vazirligi Namanganda zamonaviy sovutgichlar bilan jihozlangan vaksinalar omborxonasini ishga tushirdi. Bu haqda “Daryo” muxbiri Azizbek Abduvaliyev xabar bermoqda.
Yangi vaksinalar ombori bir yoshgacha bo‘lgan 65 mingdan ortiq bolani emlashga mo‘jallangan 12 xil turdagi 31 100 litr vaksinani saqlash imkonini beradi. Ichiga kirib yurish mumkin bo‘lgan sovutgich kameralari vaksinalar sifati uchun zarur bo‘lgan 2—8 daraja haroratni doimiy ravishda ta’minlab turadi.
UNICEF’ning O‘zbekistondagi vakolatxonasi rahbari Sasha Graumann yangi obyektni viloyat davlat sanitariya-epidemiologiya nazorati markazi bosh shifokori Rustam Hamroqulovga topshirdi.
—O‘zbekistonda bolalarni kasallikka qarshi emlash qamrovi juda yuqori. Ularni xavfli xastaliklardan ishonchli himoya qilish uchun bu ko‘rsatkichni saqlash muhim omil hisoblanadi. Namangan viloyatida yangi omborxonaning ishga tushirilishi ushbu vazifani amalga oshirishda yordam beradi, — dedi Sasha Graumann tadbirdagi chiqishi chog‘ida.
Viloyat DSENM immunoprofilaktika bo‘limi boshlig‘i Sherzod Latifjonovga ko‘ra, hozirda To‘raqo‘rg‘on, Chust va Chortoq tumanlarida ham shunday vaksinalar saqlash omborlari qurilgan. Yil oxirigacha Norin va Namangan tumanlarida yangi omborlarni ishga tushirish rejalashtirilgan. Kelgusida shahar-tumanlarga vaksinalarni yetkazib berish uchun maxsus avtorefrijeratorlar xarid qilinishi ko‘zda tutilmoqda.
Ma’lumot uchun, UNICEF va GAVI (Vaksinalar va immunizatsiya bo‘yicha global alyans) tashkiloti tomonidan O‘zbekistonga ajratilgan 22 million dollarlik grant hisobidan Qoraqalpog‘iston Respublikasi, Toshkent shahri va barcha viloyatlarda jami 21 ta vaksina saqlash omborxonasini qurish va ularni jihozlash belgilangan. Mazkur obyektlar Sharqiy Yevropa va Markaziy Osiyoda eng yaxshilari hisoblanadi.
Izoh (0)