Атом электр станцияларини қуриш ва уларни эксплуатация қилиш бўйича француз тажрибасини ўрганиш мақсадида ўзбек делегацияси 10-15 сентябрь кунлари Францияда хизмат сафарида бўлди. Бу ҳақда Энергетика вазирлиги матбуот хизмати «Дарё»га хабар берди.
Маълум бўлишича, делегация Энергетика вазирлиги, Давлат саноат хавфсизлиги қўмитаси, «Ўзатом» агентлиги ва АЭС қурилиши бўйича дирекция вакилларидан ташкил топган.
Вакиллар «General Electrics» компаниясининг «Alstom» заводи, «Orano» ва «FramatomeRomans» компаниялари фаолияти билан яқиндан танишган, — дейилади хабарда.
Сафар доирасида, «SEA» атом энергетикаси тадқиқотлар марказида Франция атом энергетикаси соҳасидаги давлат тузилмалари вакиллари билан музокаралар бўлиб, атом энергиясидан тинчлик мақсадида фойдаланиш соҳасида ҳамкорликни йўлга қўйиш ҳақида сўз борган.
Музокара давомида ўзаро ҳамкорлик, тажриба алмашиш ва кадрлар тайёрлаш бўйича аниқ чора-тадбирлар белгиланган.
Шунингдек, ўзбек мутахассислари Фламанвил шаҳридаги АЭС майдончаси билан танишгани маълум қилинди.
Маълумот учун, Франциянинг атом энергетика соҳасида 58 энергоблок, 19 атом электр станцияси фаолият юритади. Улар 2018 йилда электр энергия ишлаб чиқаришнинг 72 % таъминлади. Франциянинг атом энергетикаси 220 минг иш ўринларини таъминлайди, соҳадан бюджетга тўғридан-тўғри тушумлар йилига 1,3 миллиард еврони ташкил этади.
Изоҳ (0)