Ijtimoiy tarmoqlarda Andijon viloyati Izboskan tumanidagi maktablarning birida uchinchi qavatdagi derazadan o‘quvchi qiz tushib ketganligi haqida xabarlar tarqaldi.
Viloyat xalq ta’limi boshqarmasidan “Daryo”ga ma’lum qilishlaricha, hodisa 19-sentabr kuni soat taxminan 10:30 da Izboskan tumanidagi 39-ixtisoslashtirilgan maktab-internatining 11-“A” sinf o‘quvchisi G‘aniyeva Ismigul uchinchi soat informatika fani dars mashg‘uloti tugab, tanaffus vaqtida maktab binosining uchinchi qavatidagi zinapoya yonidagi derazada o‘tirgan holatida ehtiyotsizligi oqibatida boshi aylanib, baxtsiz hodisa sababli tushib ketgan.
Hodisa yuz bergan vaqtning o‘zidayoq o‘quvchi maktabning mas’ul xodimlari tomonidan Izboskan tumanidagi shoshilinch tez tibbiy yordam bo‘limiga olib borilgan va birinchi yordam ko‘rsatilgan. Ushbu holat yuzasidan tuman prokuraturasi va ichki ishlar bo‘limi tomonidan surishtiruv ishlari olib borilmoqda.
O‘quvchi bilan o‘tkazilgan suhbat jarayonida uning bergan og‘zaki ko‘rsatmasiga ko‘ra, hodisa yuz bergan vaqtda uning atrofida hech kim bo‘lmagan hamda unga nisbatan boshqa shaxs tomonidan qasd qilinmagan, o‘zining ham joniga qasd qilish maqsadi bo‘lmagan. “U boshi aylanib ehtiyotsizligi oqibatida tushib ketganligini, hozirda salomatligi yaxshi ekanligini bildirgan”, — deyiladi Xalq ta’limi boshqarmasi axborotida.
Mazkur holat yuzasidan qizning ota-onasi bilan o‘tkazilgan suhbat natijasida ular tomonidan muassasa mas’ul xodimlariga nisbatan hech qanday e’tirozlari yo‘qligi, haqiqatan ham farzandi Ismigul G‘aniyeva baxtsiz hodisa sababli uchinchi qavatdan tushib ketganligini, farzandi muolaja olayotgan tibbiyot muassasasida doimiy nazoratda ekanligini bildirgan.
“Daryo” muxbiri ayni paytda holatni o‘rganish maqsadida Izboskan tumanida bo‘lib turibdi.
Izoh (0)