Cambridge Assessment International Education’нинг етакчи экспертлари Стив Кинг ҳамда Доминик Слейд Британия кенгашининг лойиҳаси доирасида Ўзбекистондаги халқ таълими тизимини таҳлил қилди. Улар 10 ва 11-синфлар ўқувчиларига ўзлари таълим оладиган йўналишларни эркин танлаш имкониятини беришни тавсия этмоқда, деб хабар берди Халқ таълими вазирлиги.
Мутахассислар бундай эркин танлов 10 ва 11-синф ўқувчиларининг ОТМларга кириш имтиҳонларини муваффақиятли ўтказишида муҳим аҳамиятга эга деб ҳисобламоқда. Шунингдек, улар миллий ўқув дастурини ишлаб чиқиш, ваколат доирасидаги ёндашув асосида ўқитишни енгиллаштириш мақсадида дарсликларни қайта кўриб чиқиш лозимлигини таъкидлади. Жараёнда педагогика университетларга билими кучли абитуриентларни жалб қилишнинг аҳамияти катта эканлиги қайд этилди.
Экспертлар мактаблар фаолиятига баҳо беришга ихтисослашган махсус ташкилот тузиш, шунингдек, ўқитувчиларни сертификациялаш тизимини қайта кўриб чиқишни тавсия қилди. Уларнинг қайд этишича, халқ таълими тизимида кузатилган муаммолар бошқа давлатларда ҳам мавжуд.
Британиялик мутахассисларнинг таҳлиллар юзасидан якуний ҳисоботи Халқ таълими вазирлиги томонидан жамоатчилик муҳокамасига қўйилади.
Изоҳ (0)