«Тошшаҳартрансхизмат»нинг 38 млрд сўмлик, Тошкент метросининг 9 млрд сўмлик молиявий зарари бюджет ҳисобидан қопланади

Ўзбекистон ҳукумати Тошкент йўловчи транспорти корхоналарини молиявий соғломлаштириш ҳақида қарор қабул қилди. Бу ҳақда «Gazeta.uz» хабар бермоқда.

Ҳужжатда қайд этилишича, ўтган йил тўртинчи чораги ва жорий йил биринчи чорагида «Тошшаҳартрансхизмат» компанияси тизимига кирувчи автобус паркларида 38 миллиард, Тошкент метрополитенида эса 2018 йил давомида ва 2019 йил биринчи чорагида 9 миллиард сўмдан ошиқ қарздорлик вужудга келган.

Қарор билан Молия вазирлиги ва пойтахт ҳокимлигига «Тошшаҳартрансхизмат» автопарклари зарарини республика ва шаҳар бюджетларининг қўшимча манбалари, метрополитенга эса электр энергиясидан қарздорлик сўндирилиши бўйича республика бюджети прогнозлари ошириб бажарилгани ҳисобидан қоплаб бериш топширилган.

Вазирлар Маҳкамаси тегишли ташкилотларга икки ой муддатда «Тошшаҳартрансхизмат» ва пойтахт метросини молиявий соғломлаштириш, кўрилаётган зарар миқдорини кескин камайтириш юзасидан таклифлар киритишни топширган.

Аввалроқ, якшанба куни «Ко дну» Telegram-канали ҳаддан ташқари кўп автобуслар йўналишларга чиқмагани, кечга томон йўналишларда автобуслар деярли қолмагани ҳақида хабар берган эди. «Тошшаҳартрансхизмат» компанияси ўша оқшомнинг ўзида шундай муаммо бўлганини тан олган эди.