Бухорода 10 мингга яқин дайди ва қаровсиз ит, мушуклар йўқ қилингани маълум бўлди

Бухоро вилояти ҳудудий ободонлаштириш бошқармалари томонидан ўтган давр мобайнида жами 9107 бош дайди ва қаровсиз ҳолга келган ит, мушуклар йўқ қилиб ташланган, жасадлари «Ветсанчиқинди» заводига топширилган. Бу ҳақда Бухоро вилояти фавқулодда вазиятлар бошқармаси ‘‘Дарйў’га маълум қилган.

Фавқулодда вазиятлар бошқармаси ва Бухоро вилояти ҳокимлиги матбуот хизмати билан ҳамкорликда 17 сентябрь «Куз-қиш мавсумида аҳоли ўртасида табиий ва ис газларидан заҳарланиш, биноларда ҳаво-газ аралашмаси чақнаши ҳамда қутуриш касаллиги билан боғлиқ юзага келиши мумкин бўлган фавқулодда вазиятларнинг олдини олиш» мавзусида матбуот анжумани бўлиб ўтди.

Матбуот анжуманида, ҳудудий ободонлаштириш бошқармалари томонидан ўтган давр мобайнида жами 9107 бош дайди ва қаровсиз ҳолга келган ит ва мушуклар йўқ қилиниб, жасадлари «Ветсанчиқинди» заводига топширилгани маълум қилинди.

Маълумот берилишича, бугунги кунда вилоятда 110 минг ит рўйхатга олинган. Аммо аҳоли томонидан, айниқса, қишлоқ жойларда хонадонда сақланаётган итлар қаровсиз ва дайди ҳолга келган.

Шунингдек, кузатувлар таҳлилига кўра, дайди ва қаровсиз қолган ҳайвонлардан жабрланганларнинг аксарият қисми (54%)ни 14 ёшгача бўлган болалар ташкил этганлиги қайд қилинган.

Аввалроқ, Самарқандда ‘‘Шарқ тароналари’’ арафасида итлар заҳарлаб ўлдирилгани эълон қилинган, кейинроқ, бир маҳаллада 10 та ит ўлдирилгани рад қилинган ва ит ва мушукларни заҳарлаб ўлдирган мансабдор шахслар эгаллаб турган лавозимларидан озод этилгани маълум бўлган.