Ижтимоий тармоқларда Самарқанд шаҳрида ўтказилган тўй маросимида овқатдан оммавий заҳарланиш бўйича хабарлар тарқалди. Вилоят соғлиқни сақлаш бошқармаси мазкур масалага ойдинлик киритди, деб хабар беради Самарқанд вилояти ҳокимлиги матбуот хизмати.
Самарқанд вилояти юқумли касалликлар шифохонасига жорий йилнинг 16 сентябрь куни соат 16:10 дан соат 18:30 га қадар турли хонадонларда яшовчи 7 нафар фуқаролар бир хил клиник белгилар билан мурожаат қилган.
Заҳарланиш сабабларини ўрганиш борасида ўтказилган дастлабки эпидемиологик суруштурувларда барча беморлар Самарқанд шаҳрининг Регистон кўчасида жойлашган «Мўъжиза» ресторанида 14 сентябрь куни кечки вақтда ўтказилган тўйдан сўнг, ортиб қолган гўшт ва ассорти маҳсулотларини уйларига олиб келишгани, бу таомларни жорий йилнинг 15 сентябрь куни тушликда ва кечки овқатда истеъмол қилганликлари аниқланган.
«Kun.uz» нашрининг ёзишича, шанба куни бўлгани тахмин қилинаётган тўйда овқатдан заҳарланган 10 дан ортиқ одам шифохонага мурожаат қилган ва улар келишда давом этмоқда: «Ўша тўйда заҳарланган одамлар ҳамон келмоқда. Уларнинг аҳволи оғир эмас», — дейди Самарқанд вилояти юқумли касалликлар шифокори.
Facebook ижтимоий тармоғидаги «Мен самарқандликман» гуруҳида фойдаланувчилардан бири шундай пост қолдирган: «14 сентябрь куни ҳавас қилиб тўй қилдим. Киши бошига 180 минг сўмдан тўладим. Кейин нима бўлди? 200 киши овқатдан заҳарланди. Улар орасида меҳмонлар, дўстлар, қўшнилар бор эди. Қанчалик алам қилаётганини сўз билан изоҳлай олмайман».
Изоҳ (0)