Ijtimoiy tarmoqlarda Samarqand shahrida o‘tkazilgan to‘y marosimida ovqatdan ommaviy zaharlanish bo‘yicha xabarlar tarqaldi. Viloyat sog‘liqni saqlash boshqarmasi mazkur masalaga oydinlik kiritdi, deb xabar beradi Samarqand viloyati hokimligi matbuot xizmati.
Samarqand viloyati yuqumli kasalliklar shifoxonasiga joriy yilning 16-sentabr kuni soat 16:10 dan soat 18:30 ga qadar turli xonadonlarda yashovchi 7 nafar fuqarolar bir xil klinik belgilar bilan murojaat qilgan.
Zaharlanish sabablarini o‘rganish borasida o‘tkazilgan dastlabki epidemiologik surushturuvlarda barcha bemorlar Samarqand shahrining Registon ko‘chasida joylashgan “Mo‘jiza” restoranida 14-sentabr kuni kechki vaqtda o‘tkazilgan to‘ydan so‘ng, ortib qolgan go‘sht va assorti mahsulotlarini uylariga olib kelishgani, bu taomlarni joriy yilning 15-sentabr kuni tushlikda va kechki ovqatda iste’mol qilganliklari aniqlangan.
“Kun.uz” nashrining yozishicha, shanba kuni bo‘lgani taxmin qilinayotgan to‘yda ovqatdan zaharlangan 10 dan ortiq odam shifoxonaga murojaat qilgan va ular kelishda davom etmoqda: “O‘sha to‘yda zaharlangan odamlar hamon kelmoqda. Ularning ahvoli og‘ir emas”, — deydi Samarqand viloyati yuqumli kasalliklar shifokori.
Facebook ijtimoiy tarmog‘idagi “Men samarqandlikman” guruhida foydalanuvchilardan biri shunday post qoldirgan: “14-sentabr kuni havas qilib to‘y qildim. Kishi boshiga 180 ming so‘mdan to‘ladim. Keyin nima bo‘ldi? 200 kishi ovqatdan zaharlandi. Ular orasida mehmonlar, do‘stlar, qo‘shnilar bor edi. Qanchalik alam qilayotganini so‘z bilan izohlay olmayman”.
Izoh (0)