Ижтимоий тармоқда Қашқадарё вилоятининг Қамаши туманидаги Қўшкапа қишлоғида жойлашган кўприклардан бири қулаш арафасига келгани боис кўприкдан ўтиб-қайтувчи автомобиллар ҳаракати тўхтагани, қишлоқ аҳолиси эса бир ойдан бери «қамал»да қолгани ҳақида хабар тарқалди. Ижтимоий тармоқ фойдаланувчисининг қўшимча қилишича, аҳолига ёрдам беришга ошиқаётган тез ёрдам автомобиллари ҳам кўприкдан ўтолмай қийналаётган экан.
«Дарё» мухбири воқеа жойида бўлиб, ҳолатни ўрганди.
— Кўприк силжиб, ўтиб-қайтувчи аҳоли учун хавфли ҳолатга келганига 20 кун бўлди, — дейди Қўшкапа қишлоғида яшовчи Илҳом Дўстқобилов. — Ўтган вақт давомида бир нечта раҳбар келиб вазиятни ўрганиб кетди. Аммо амалий натижа йўқ.
Баҳриддин Саломатовнинг маълум қилишича, мазкур кўприкдан ҳар куни минглаб аҳоли қатори мактаб ўқувчилари ҳам қатнайди.
— Шу кўприкдан ўтган жойда — Қўшкапа маҳалласида яшайман, — дейди Низомиддин Исаев. — Ҳар куни шу кўприкдан ўтиб ишга қатнайман. Ўзимку, майли. Аммо ҳар куни қулаш арафасига келган кўприкдан ўтиб қайтаётган фарзандимдан қўрқаман. «Нима бўлди экан, тинчмикин?» деган ўй-хаёл хавотирга солади.
Аниқланишича, мазкур кўприк Юқори Чим қишлоғида жойлашган Қўшкапа қишлоғи ва маҳалласини ажратиб туради. Биргина Қўшкапа маҳалласида 6950 нафар аҳоли истиқомат қилади. Маҳаллада 285 нафар ўқувчини бағрига олган 81-умумий ўрта таълим мактаби жойлашган бўлиб, кўприкнинг бу томони — Қўшкапа қишлоғидан мактабга қатновчи ўқувчилар жами ўқувчилар сонининг 60 фоизини ташкил этади.
Қамаши туман ҳокими ўринбосари Қурбон Ҳайдаровнинг маълумот беришича, мазкур кўприк остидаги зовурга Пахтаобод каналидан сув тушади ва Қашқадарё дарёсига бориб қўшилади.Маҳаллий аҳолининг айтишича, кўприкнинг силжишига зовур сувининг ўз йўналишини ўзгартириши сабаб бўлган.
— Жорий йил баҳорда зовурдан 35-40 куб сув келди, сув сиғими, ҳатто 50 кубгача етди, — дейди маҳаллий аҳоли «Дарё» мухбири билан суҳбати давомида. — Оқим йўналишини ўзгартиргани хусусида масъулларга хабар бердик. Аммо ҳеч ким қулоқ солмади. Мана оқибати.
Қишлоқ аҳлининг қўшимча қилишича, зовур суви ўз оқимини ўзгартирганига бир неча йил бўлган. Аҳоли ўша пайт туманга раҳбарлик қилган Рашид Муҳаммадиевга бу ҳақда кўп мурожаат қилган. Бундан бир муддат илгари зовур суви йўналишини тўғирлаш учун қурилиш ташкилотларидан бири таъмирлаш ишларини олиб борган. Аммо сифатсиз бажарилган иш тез ўтмай «ўз сўзини айтган».
— Туман марказига бориш учун ёки бирор бир юмуш билан кўчага чиқиш учун 4-5 километр масофа яёв юришга тўғри келяпти, айниқса, болаларни кўтариб чиққан пайтимиз роса қийналяпмиз, — дейди Барно Ҳасанова. — Тезроқ масъуллар эътибор қаратиб, муаммони ҳал этишса яхши бўларди.
Ҳудуд аҳолисининг маълум қилишича, мазкур кўприкдан қатнов чекланиши оқибатида қишлоққа кириш учун айланма йўлдан юришга тўғри келмоқда. Айланма йўл эса 10 километр ортиқча масофа дегани.
— Энг ёмони, шошилинч тиббий ёрдамга муҳтож аҳолига ёрдам кўрсатувчи тез тиббий ёрдам автомобиллари ҳам қишлоққа киришга қийналмоқда, — дейди аҳоли вакиллари. — Айланма йўлдан 10 километр ортиқча масофа босиш чақирувга келиш муддатини узайтирмоқда.
Ушбу муаммони ўрганиш учун 16 сентябрь куни воқеа жойига борганимизда ҳудудда вилоят ҳокими ўринбосари Сирожиддин Азизов, туман ҳокими Шерали Санаев ҳамда ўринбосарлари муаммони ўрганаётган экан.
Масъулларининг маълумот беришича, кўприк таъмири учун қарийб 1 миллиард сўм маблағ керак бўлади.
Туман ҳокими ўринбосари Қурбон Ҳайдаров кўприк таъмири учун қурилиш ташкилоти жалб қилинганлигини, 17 сентябрь куни лойиҳачилар, ундан сўнг эса қурувчи ташкилот вакиллари келиб иш бошлашини маълум қилмоқда.
Кўприк силжиб, аҳоли учун хавфли ҳолатга келиб қолганига 20 кун бўлган бўлсада, муаммога эндигина эътибор қаратган масъулларнинг эрта-индин иш бошланиши ҳақидаги гапига унчалик ҳам ишонмадик, тўғриси. Аммо буни вақт кўрсатади.
«Дарё» воқеалар ривожини кузатишда давом этади.
Изоҳ (0)