«Дарё»да қашқадарёлик тез тиббий ёрдам ҳайдовчиси Илҳом Усмоновнинг мурожаати асосида «Мени ноҳақ ишдан бўшатишди». Қашқадарёлик тез тиббий ёрдам ҳайдовчиси раҳбариятини адолатсизликда айбламоқда» сарлавҳали мақола чоп этилганди.
Мазкур мақолага Қашқадарё вилояти Касаба уюшмалари ташкилотлари бирлашмаси муносабат билдириб, тез тиббий ёрдам ҳайдовчиси ноҳақ ишдан бўшатилганлиги, вилоят соғлиқни сақлаш бошқармаси махсус ва тез тиббий ёрдам автохўжалиги раҳбарига бу ҳақда тақдимнома киритилганлигини маълум қилмоқда.
Вилоят Касаба уюшмалари ташкилотлари бирлашмаси кенгаши раиси Эсон Ражабов имзолаган тақдимномага кўра, махсус ва тез тиббий ёрдам автохўжалиги раҳбари ходимини ишдан бўшатишда қуйидаги ҳужжатларни келтирмасдан хатога йўл қўйган.
Ходимни ишдан бўшатиш тўғрисидаги буйруқнинг асослантирувчи қисмида касаба уюшма қўмитасининг розилик бериш тўғрисидаги қарори йўқ.
Ходимнинг изоҳли тушунтириш хати ёки тушунтириш хатини беришдан бош тортганлиги ҳақидаги далолатнома ҳам тузилмаган.
Касаба уюшма юқоридаги асосларга кўра, ҳайдовчи Илҳом Усмонов ноҳақ ишдан бўшатилган ва у ўз ўрнига тикланиши керак, деган фикрда.
Маълум бўлишича, вилоят Касаба уюшма соғлиқни сақлаш бошқармаси махсус ва тез тиббий ёрдам автохўжалиги раҳбарига камчиликларни бартараф этиб, бу ҳақда ёзма маълумотнома тақдим этишни сўраган.
Ҳайдовчи Илҳом Усмоновнинг «Дарё»га қўшимча қилишича, у Қашқадарё вилоят соғлиқни сақлаш бошқармаси махсус ва тез тиббий ёрдам автохўжалиги раҳбариятини судга берган. Собиқ ҳайдовчи суддан ишга тиклаш, маънавий зарар ва иш ҳақини ундириб беришни сўраган.
Айтилишича, мазкур иш жорий йилнинг 18 сентябрь куни фуқаролик ишлари бўйича Қарши туманлараро судида кўриб чиқилади.
«Дарё» суд натижаси хусусида ҳам хабар беради.
Изоҳ (0)