Ўзбекистонда юқори малакали кадрларини аниқлаш мақсадида ўтказилган «Тараққиёт» танлови ғолиби, Бош прокуратура Академиясининг Жиноятларнинг содир этилиши сабабларини тизимли таҳлил қилиш ва ўрганиш маркази бошлиғи Носиржон Асқаров «Дарё» мухбирига берган интевюсида бугунги кундаги кадрлар эътибор қаратиши лозим бўлган бешта муҳим масалани айтди.
«Тараққиёт» биринчи республика танлови Ўзбекистон Президенти Шавкат Мирзиёевнинг 2018 йил 30 майдаги «Истиқболли бошқарув кадрларини танлов асосида танлаб олишнинг замонавий тизимини яратиш чора-тадбирлари тўғрисида»ги қарорига кўра ташкил этилган. Танлов мамлакатдаги юқори малакали кадрларни аниқлаш ва уларни рағбатлантириш мақсадида ўтказилган.
Танловнинг қуйи босқичида 8 мингдан ортиқ раҳбар ходимлар 16 йўналиш бўйича саккиз ой давомида сараланган. Улар аниқ бўлмаган ва қийин вазиятларда тезкор қарор қабул қилиш, хорижий тиллар, психологик барқарорлик, бошқариш қобиляти синовларидан ўтказилган.
Талабгорлар орасидан саралаб олинган 150 нафар иштирокчи финал босқичида иштирок этиш ҳуқуқини қўлга киритган. Якунда улар орасидан ҳам энг кучлилари аниқланиб, якунда 50 нафар раҳбар ғолиб деб топилган.
Келажакда «Тараққиёт» танлови ғолиблари орасидан юқори даражадаги бошқарув компетенсиялари ва раҳбарлик фазилатларига эга бўлган истиқболли бошқарув кадрлари захираси шакллантириш кўзда тутилган.
Танловнинг барча босқичларида юқори балл тўплаган Носиржон Асқаров «Суд-ҳуқуқ соҳасида энг яхши бошқарувчи» номинациясида ғолиб бўлган. Унга мукофот сифати энг кам ойлик иш ҳақининг 50 баравари миқдорида бир марталик пул мукофоти берилди ҳамда у мазкур соҳа бўйича ривожланган мамлакатларда камида уч ойлик стажировка ўташ имкониятига эга бўлди.
Бош прокуратура раҳбарияти юқори савияли танловдаги муносиб ҳиссаси учун Асқаровни Бош прокуратура Академияси Жиноятларнинг содир этилиши сабабларини тизимли таҳлил қилиш ва ўрганиш маркази бошлиғи лавозимига тайинланган.
Ҳуқуқшунос Носиржон Асқаров прокуратура органларининг қуйи тизимларида турли раҳбарлик лавозимларда ишлаган, Ўзбекистон Президенти ҳузуридаги Давлат бошқаруви Академиясини тамомлаган, Малайзиянинг Кебангсан университетида малака ошириб қайтган.
Носиржон Асқаров биз билан суҳбатда миллий бошқарув тизимидаги ўзига хосликлар, ютуқ ва камчиликлар ҳақида мулоҳазаларини баён этди. Иш тажрибаси ва чет мамлакатларда бошқарув тизими ҳақида билганлари билан ўртоқлашар экан, одатий ҳаётимизда раҳбар кадрлар учун керак бўладиган бир нечта таклифларини билдириб ўтди.
Самарали меҳнат сири
Ходимлар меҳнатидан самарали фойдаланиш ва иш вақтида самарали машғулотга йўналтиришни таъминлаш бошқарувчининг асосий маҳоратларидан биридир. Ҳозирги вақтда баъзи ташкилотлардаги асосий муаммо ҳам нормаланмаган иш вақтидир. Яхши ва ўз вақтида дам олмаган ходимда кутилган самара ва натижадорлик бўлмайди. Шунинг учун, қўлостингиздаги ходим зиммасига бирор иш юклаганингизда унинг нормал ҳордиқ чиқариш вақтини ҳисобга олинг.Барча ҳаракат натижа учун
Google компаниясида йўлга қўйилган бир жиҳат — асосий нарса натижага қаратилганлиги менга жуда ёқади. Бунда ходимга вазифа берилади ва натижага эришиш масала қилиб қўйилади. Натижага қандай эришиш, ходим бу вақтда қаерда бўлади ҳеч кимни қизиқтирмайди. Асосийси натижа бўлмаса, ходим билан хайрлашилади. Ўз ўзидан ходим муаммони ҳал этиш ва натижага эришиш учун барча воситаларни ишга солади. Бу тизим қанчалик ўзини оқлагани ушбу компаниянинг дунёда тутган ўрни ҳам кўрсатиб турибди.Яхши кадрни макали кадрлар яратади
Осиё «йўлбарс»и — Сингапур салоҳиятли кадрлар сиёсати орқали катта ривожланиш йўлига чиқди. Сингапур президенти: «Бу мамлакатни халқ ва ўқитувчилар яратади» дейди. Яъни садоқатли ўқитувчилар мамакали кадрларни етиштириб берди. Сиз ҳам кўп йиллик иш тажрибага эга ва виждонли ходимларни ёш кадрлар билан устоз-шогирд тизимини йўлга қўйинг. Яхши кадрларни тажрибали кадрлар яратади.Қанчалик ўзингизга ишонсангиз ҳам ўрганишдан тўхтаманг
Мен ўзимга ишонган одамман. Бироқ «Тараққиёт» танловидаги вазифалар ҳамда топшириқларнинг ҳар хил тузилганлиги, раҳбар бошқарув тизимини янада яхшилаш борасида ўз устида доимо ишлаб бориши лозимлигини менга яна бир бор исботлаб берди.Кадрларни қадрлаш...
Ўз вазифасини бажаролмаётган ходимга раҳбар буюрилаётган иш қандай бажарилиши лозимлигини бир неча марта кўрсатиб бериши керак. Бу бевосита раҳбарнинг вазифаси. Ўргатмасдан туриб ходимдан натижани талаб қилиш ўзаро муносабатларга путур етказади. Бир неча бор кўрсатиб тушунтириб, аниқ ифодалаб берганингиздан сўнг ҳам натижа бўлмаса, унда у ходимни баҳридан ўтиш керак. Ўз вазифасини бажаролмаётган ходим ишини бошқа, ўз вазифасини виждонан бажарадиган ходимга юклайвериш аввало адолатсизлик бўлса, иккинчидан иш самарадорлигига салбий таъсир кўрсатади. Шу билан бирга, бу нарса ходимлар ўртасидаги ўзаро муҳитга ҳам таъсир қилмай қолмайди. Алалоқибат, вазифаларни сидқидилдан бажаридган ходимнинг ўзини ҳурмат қиладиган бошқа ишга ўтиб кетишининг эҳтимоли катта.Маълумот учун, Ўзбекистон Бош прокуратураси Академияси прокуратура органларининг таълим ва илмий тадқиқот муассасаси ҳисобланади.
Изоҳ (0)