Вазирлар Маҳкамаси қарори билан Россиянинг «Москва энергетика институти (МЕИ)» миллий тадқиқот университети Тошкент филиалига раҳбар тайинланди, дея хабар бермоқда Адлия вазирлигининг Telegram’даги «Ҳуқуқий ахборот» канали.
Ҳукуматнинг 15 сентябрдаги қарори билан Ҳожиакбар Далиев Россия университети филиалининг ижрочи директори лавозимини эгаллаган. Хабар беришларича, Далиев мазкур тайинловга қадар Ўзбекистон Миллий университети Физика факультети декани эди.
«МЕИ» миллий тадқиқот университетининг Тошкент филиали Ўзбекистон Президентининг 2019 йил июнь ойидаги қарорига асосан ташкил этилган (филиални очиш бўйича келишув 2018 йил октябрида имзоланган эди).
Филиалнинг асосий вазифалари этиб қуйидагилар белгиланган:
- Ўзбекистон энергетика тармоғи учун малакали муҳандис-техник кадрлар тайёрлаш;
- замонавий таълим дастурлари ва ўқитиш шаклларини ишлаб чиқиш;
- соҳага оид илмий ва инновацион тадқиқотлар олиб бориш;
- таълим ва илмий-техник соҳада етакчи хорижий таълим муассасалари билан муносабатларни ривожлантириш;
- эҳтиёжга кўра мазкур соҳа мутахассисларининг малакасини ошириш.
Изоҳ (0)