General Motors Uzbekistan (ҳозирги UzAuto Motors) компанияси 2018 йил охирида бир қатор имтиёзлардан маҳрум қилинган эди. Компания аввалги йилларда барча турдаги солиқ ва мажбурий тўловлардан озод қилинган бўлса, 2019 йилдан бошлаб фақат ҚҚС тўловидан озод қилинди, холос. 1 октябрдан бошлаб компания бу солиқни ҳам тўлашни бошлайди, дея эслатмоқда Spot.
Фото: ЎзА
Шу муносабат билан айрим дилерлик корхоналарининг ходимлари харидорларни нархлар ошиши мумкинлиги ҳақида огоҳлантиришни бошлаган. Ижтимоий тармоқларда тарқалган хабарларга кўра, нархлар ошиши ҚҚС бўйича имтиёзнинг бекор қилиниши билан боғланмоқда, бу эса ўз навбатида автомобиль таннархининг ошишига ва унинг чакана нархига таъсир кўрсатади.
UzAuto Motors’дан маълум қилишларича, компания ҳозир амалда бўлган нархларни сақлаб қолиш учун имкони бор барча чораларни кўради.
«Сиздан автомобиль хариди чоғида дилерлик корхоналари ходимлари томонидан нархлар ошиши борасида берилаётган бошқа маълумотларга ишонмасликни, барча расмий маълумотлар фақат компаниянинг расмий сайтида эълон қилиниши ҳамда автомобилларингиз шартномада белгиланган муддатларда тақдим этилишини маълум қиламиз», — дейилади компания ахборотида.
Компаниянинг қайд этишича, 1 октябрдан бошлаб Ўзбекистонда ишлаб чиқарилган янги машиналарни сотиб олганлик учун Республика йўл жамғармасига амалга ошириладиган 3 фоизлик йиғим ишлаб чиқарувчининг ўзи томонидан тўланади (энди янги машина олганда Ички ишлар органига 3 фоиз пул тўлаш шарт эмас). Шу боис 1 октябрдан машина нархларига шу 3 фоизлик йиғим ҳам қўшилади.
«UzAuto Motors 1 октябрдан ҚҚС тўловчисига айланади ва компания томонидан мазкур ҳолат харидорларга ортиқча сарф-ҳаражат ва ноқулайлик келтириб чиқармаслиги учун барча саъй-ҳаракатлар амалга оширилди ҳамда автомобиль нархлари, Республика йўл жамғармасига амалга ошириладиган тўловни инобатга олмаганда, ўзгаришсиз қолдирилди», — дейилади компания хабарида.
Компания ишлаб чиқараётган алоҳида моделларнинг нархлари сўнгги бор 2018 йили ўртача 7,7 фоизга оширилган эди. Нисбатан арзон ва оммабоп ҳисобланган Spark, Nexia ва Cobalt моделларининг нархлари ўзгаришсиз қолдирилган эди.
