Тошкентнинг Абай ва Навоий кўчалари кесишган чорраҳада 15 сентябрь, якшанба куни соат 13:30 атрофида икки автомобиль иштирокида йўл-транспорт ҳодисаси юз берди, дея хабар бермоқда Тошкент шаҳар ИИББ матбуот хизмати.
Дастлабки маълумотларга кўра, Навоий кўчаси бўйлаб ҳаракатланиб келаётган кумушранг Nexia-2 машинаси ҳайдовчиси чорраҳада чапга бурилиб, асосий йўл бўйлаб келаётган оқ рангли Nexia-3 автомобилига йўл бермаган.
Оқибатда Nexia-3 автомобили Nexia-2 га келиб урилган. Nexia-2 нинг олд ўриндиғида ўтирган 1979 йилда туғилган Дилором Х. олган тан жароҳатлари оқибатида ҳодиса жойида ҳалок бўлган. «Унинг қариндошлари ва яқинларига ҳамдардлик билдирамиз», — дейилади ИИББ ахборотида.
Худди шу автомобилда бўлган яна икки йўловчи — орқа ўриндиқда уч ёшли боласи билан бирга ўтирган аёл (ҳозирда унинг шахсини аниқлаш устида иш олиб борилмоқда) — тан жароҳатлари билан касалхонага ётқизилган. ИИББ ахборотида уларнинг жорий аҳволи ҳақида маълумот берилмаган.
Изоҳ (0)