Тошкент илк бор ҳар йили 16—22 сентябрь кунлари бўлиб ўтадиган ва 50 га яқин давлат иштирокчиси бўлган Европа мобиллик ҳафталигининг расман қатнашчисига айланади. Бу ҳақда «Gazeta.uz» хабар бермоқда.
Ҳафталик давомида Тошкентда соғлом турмуш тарзини тарғиб этиш ва ҳаракатланишнинг турли усулларини оммалаштиришга қаратилган тадбирлар ўтказилиши режалаштирилган. Жумладан, ташкилотчилар пойтахт аҳолиси ва меҳмонларни икки кампанияда иштирок этишга таклиф қилади.
Ҳозирда 39 километрга чўзилган ва 29 та бекатга эга Тошкент метросининг кунлик йўловчи оқими атиги 200 минг кишини ташкил этмоқда. Бу бошқа пойтахтларга солиштирганда жуда паст кўрсаткич.
Ерости транспортидан фойдаланишни оммалаштириш мақсадида 19 сентябрь куни Тошкент метросида қатнов бепул бўлади. Бекатлараро ўтиш жойлари созандалар ва актёрларнинг чиқишлари учун майдонга айланади.
22 сентябрь куни эса аҳоли ва меҳмонларга автомобилларини қолдириш ва Учтепа туманининг Лутфий кўчаси бўйлаб пиёда юриш таклиф қилинади. Мазкур кўча кун бўйи автомобиллар учун ёпиқ бўлади, кўнгилочар ва маърифий тадбирлар ўтказилади.
«Автомобильсиз кун» акцияси «Сеул» боғидаги байрам концерти билан якунланади. Шу кунги тадбирлар «Биз билан юр!» шиори остида ўтади.
Изоҳ (0)