Президент топшириғига биноан қўшилган қиймат солиғи ставкаси 20 фоиздан 15 фоизгача туширилиши ҳақида хабар берилган эди.
Давлат солиқ қўмитасида мазкур қадам нафақат Ўзбекистонда, балки бутун Марказий Осиё минтақасида инвестиция ва иқтисодий ўсишнинг асосий омили бўлиши кераклиги қайд этилди, деб ёзади Spot.
Таъкидланишича, ҚҚС ставкасини пасайтириш — бу солиқ сиёсатини такомиллаштириш концепциясини ишлаб чиқишда бўлгани каби, бугунги сиёсий ва иқтисодий қарорларда ҳам акс эттирилган жамоатчиликка йўлланма ҳисобланади.
«Албатта, бу солиқ маневри кучли иродали ва давлат учун қийин, чунки бюджетга солиқ тушумларининг учдан бир қисми ҚҚС билан таъминланади. Давлат бюджети даромадларининг қисқариши хавфига қарамай, устуворлик солиқ юкини камайтириш ва мамлакатда тадбиркорликни ривожлантиришга берилди», дейилади қўмита хабарида.
Қайд этилишича, ҚҚС ставкаси 15 фоизга пасайиши пул-кредит сиёсатининг юмшаши ва нархларнинг барқарорлашуви белгиси ҳамдир. Амалдаги 20 фоизлик солиқ ставкаси 2000 йилда ташкил этилган ва сўнгги 19 йил ичида қайта кўриб чиқилмаган.
Шунингдек, Ўзбекистон 2008 йилдаги глобал молиявий инқироздан кейин ҚҚС ставкасини сезиларли даражада пасайтиришга эришган биринчи мамлакат бўлгани таъкидланди.
Бундай қарорнинг қабул қилиниши солиқ юкини сезиларли даражада камайтириши ва солиқ тўловчилар ихтиёрида 10 триллион сўмдан кўпроқ маблағ қолиш имконини бериши кутилмоқда.
Изоҳ (0)