Олий суднинг сайёр қабулида аёлдан қамоқдаги ўғлини ёки эрини озод қилиш ҳақида сўралди. Аёл эрини танлади

Олий суднинг Сурхондарёда ўтказилган сайёр қабулида кутилмаган ҳолат юз берди, деб хабар беради вилоят ҳокимлиги матбуот хизмати.

Сайёр қабулда эри ва ўғли фирибгарликда айбланиб, қамалган аёлнинг мурожаати ўрганилди.

Ўрганиш натижаларига кўра, етказилган миқдорнинг асосий қисми қоплаб берилгани учун қамалганлардан бирини озодликка чиқаришга қарор қилинди. Шунда суд раҳбарияти аёлдан «Эрингизни озод қилайликми ёки ўғлингизни?» деб сўраганида аёл «эримни» дея жавоб берган.

«Ўтган ҳафта Ўзбекистон Республикаси Олий судида фирибгарликда айбланиб, озодликдан маҳрум этилган ота-болага оид жиноят ишининг отага тегишли қисми назорат тартибида кўриб чиқилди. Отага нисбатан тайинланган озодликдан маҳрум этиш жазосининг ўталмай қолган қисми озодликдан чеклаш жазосига алмаштирилиб, маҳкумнинг тегишли муассасадан дарҳол озод қилиниши ҳақида ажрим қабул қилинди», — дейилади хабарда.