Тожикистоннинг Кўлоб шаҳрида 8 сентябрь куни Тожикистон алоқа хизмати раҳбари ва президент Эмомали Раҳмоннинг қудаси бўлган Бег Сабур маҳаллий полиция бўлимининг жиноят қидирув ходими билан муштлашди. Бу ҳақда Ca-News хабар бермоқда.
Гувоҳларнинг сўзларига кўра, жиноят қидирув ходими Эмомали Раҳмон ташрифи арафасида у юрадиган йўллардаги объектларни текширган. У Кўлобда шаҳар боғи яқинида Бег Сабур томонидан қурилаётган бинолардан бирига кириб, текширмоқчи бўлган.
Милиция ходими бино президент қудасига тегишли эканлиги, яхшиси уни айланиб ўтиш кераклиги ҳақида огоҳлантирилган. Аммо у бино Бегникими, дегникими (дег тожик тилида қозон бўлиб, ҳақоратомуз ҳисобланади) фарқи йўқлигини айтган. Буни Бег Сабурнинг ўзи эшитиб қолган ва унга ташланган.
Бег Сабурнинг жиянлари ҳам етиб келиб, милиция офицерини дўппослашга қўшилган. Шундан сўнг калтакланган милиционерни Бег Сабурнинг одамлари ИИВнинг Кўлоб бўлими ходимларига топширган. Милиция ходимининг кейинги тақдири номаълум.
Айрим ОАВларда у ҳибсга олингани айтилган, аммо бу маълумот ҳозирча тасдиқланмаган. Расмийлар эса бу воқеа юзасидан ҳеч қандай изоҳ бермаган.
Тожикистон президенти кейинги ҳафтада Кўлобга ташриф буюради. Унинг иштирокида Кўлоб шаҳар боғи яқинида Бег Сабур томонидан қурилган меҳмонхона ва бир неча турар жойлар очилиши кутилмоқда.
Хабарда таъкидланишича, Тожикистон алоқа хизмати раҳбари ва президент Эмомали Раҳмоннинг қудаси бўлган Бег Сабур мамлакат қонунчилигида ҳукумат амалдорларининг бизнес юритиши тақиқланганига қарамай, Тожикистон қурилиш бозорининг етакчиларидан ҳисобланади.
Изоҳ (0)