Алимент тўловлари бўйича қарзини беришни истамасдан Мажбурий ижро бюросининг Риштон туман бўлими давлат ижрочисини калтаклаган Учариқ туман фуқаросига нисбатан жиноят иши қўзғатилди. Бу ҳақда Бош прокуратура матбуот хизмати «Дарё»га маълум қилди.
Жорий йилнинг 30 август куни Риштон туман МИБ ижрочиси қарздор М.М. исмли фуқаро билан учрашиб, алимент тўловлари билан боғлиқ бўлган қарзларини ундириш учун унга МИБ туман бўлимига бориши лозимлигини билдирган. Бироқ М.М. уни ҳақорат қилиб, ерга йиқитиб калтаклаган.
Мазкур ҳолат юзасидан 5 сентябрь куни Риштон туман прокуратураси томонидан Жиноят кодексининг 219-модда 2-қисми билан жиноят иши қўзғатилган бўлиб, ҳозирда тергов ҳаракатлари олиб борилмоқда.
Август ойида Қашқадарёнинг Косон туманида яшовчи фуқаролардан бири электрдан ноқонуний фойдаланаётганини аниқлаган МИБ ходимларини калтаклаган эди. Июль ойида эса Сурхондарёда электрдан қарзи туфайли тармоқдан узиб қўйилган уй эгалари ҳам МИБ ходимларини дўппослаганди. Шунингдек, жорий йилнинг июнь ойида Фарғонада 75 минг сўм қарздорликни деб яна бир МИБ ходими калтакланган эди. Тошкентлик аёл МИБ ходимига шапалоқ тортиб, кейин унга туҳмат қилгани ҳам тармоқларда анча муҳокама бўлганди.
Изоҳ (0)