4 сентябрь куни Ўзбекистонда фаолият юритаётган 9904 та давлат умумтаълим муассасасида 2019—2020-ўқув йили бошланади. Мазкур ўқув йилида мактаблар ўтган ўқув йилига нисбатан 213 тага кўпайган.
Халқ таълими вазирлиги матбуот хизматининг маълум қилишича, бугун Республиканинг барча умумтаълим мактабларида янги ўқув йили бошланиши муносабати билан «Билимлар куни» тадбирлари бўлиб ўтади. «Жонажон Ўзбекистоним, мангу бўл омон!» шиори остида мустақиллик дарслари ташкил этилади.
Жорий йилда 937 та мактабда инвестиция ва бошқа давлат дастури доирасида қурилиш-таъмирлаш ишлари амалга оширилиб, бунинг учун 2,86 триллион сўм сарфланди. Бу кўрсаткич ўтган йилга (1,47 триллион сўм) нисбатан қарийб икки бараварга кўп.
Таълим сифати нисбатан юқори бўлган таълим муассасалари тажрибасини бошқа умумтаълим мактабларида жорий этиш мақсадида намунали мактаблар негизида 71 та тармоқ мактаблари ташкил этилди.
Фаолиятини тугатаётган 383 та касб-ҳунар коллежларининг биноси (шундан 154 таси янги мактаб, 229 таси қўшимча бино) мактабларга берилиши натижасида қўшимча 224 мингдан ортиқ ўқувчи ўринлари яратилди.
2019—2020-ўқув йилида мактабларда жами 6,16 миллион нафар ўқувчи таҳсил олади. Шундан 620 минг нафардан ортиқ ўқувчи илк бор 1-синфга қадам қўяди. Уларга 12 турдаги ўқув қуроллари ўрин олган «Президент совғаси» топширилади.
Изоҳ (0)