Доғистон полицияси иш масаласида алданиб, қийин аҳволда қолган ўзбекистонлик икки нафар фуқарога ёрдам берди. Бу ҳақда Доғистон ИИВ матбуот хизмати хабар берди.
Маълум бўлишича, Доғистон ИИВнинг «ишонч телефони»га ўзбекистонлик Ҳамид Саидов қўнғироқ қилиб, Махачқала шаҳри яқинида «мушкул ҳолатда қолган» акаси Комилжон Матёқубов ва унинг хотини Сурайё Назаровани топиш ҳамда ватанга қайтаришни сўраган.
Унинг сўзларига кўра, 2019 йилнинг июнь ойи бошида Сергей исмли шахснинг таклифи билан эр-хотин пул топиш учун Хоразмнинг Питнак шаҳридан Доғистоннинг Махачқала шаҳрига борган. Сергей уларни Арсен исмли шахс билан таништирган бўлиб, улар бу шахснинг уйида ишлаши керак бўлган.
Улар 2 ой давомида текинга ишлаб беришга, эвазига Арсен уларга ишлаш учун рухсат берувчи тегишли ҳужжатларни расмийлаштириб бериш ва озиқ-овқат билан таъминлашни ўз зиммасига олишга келишган. Шундан сўнг уларга бажариши лозим бўлган ишларни тушунтириб, уйи яқинидаги вагончага жойлаштирган.
Улар 3 ой давомида қорамол боққан. Кейинчалик Арсен ва Комилжон ўртасида жанжал келиб чиққан ва эр-хотинни кўчага ҳайдаб, ишлаб топган пулларини бермаган.
Қўнғироқ қилган эркак айни пайтда акаси ва унинг хотини қийин аҳволда эканлиги, маҳаллий ер, қаерда эканликлари ва рус тилини билмасликлари, қайтиб келиш учун ҳам пуллари йўқлигини айтган.
«Левашин тумани полициячилари Ўзбекистон фуқаролари қаерда эканини аниқлаб, уларни туман бўлимига олиб келди ва яқин вақт ичида ватанга қайтишларига ёрдам беради», — дейилади Доғистон ИИВ хабарида.
Изоҳ (0)