2019 йилнинг бошидан буён Франциядан Англия қирғоқларига ўтиш учун мингдан ортиқ ноқонуний мигрантлар Ла-Манш бўғозини кечиб ўтди, деб ёзмоқда «Коммерсантъ».
Қайд этилишича, 22 августдан бошлабоқ у ерга 200 дан ортиқ одам, шу жумладан, 41 нафар бола келган. Бутун 2018 йил давомида Ла-Манш орқали Буюк Британияга келган ноқонуний мигрантлар сони камида 300 нафарни ташкил этган.
Британия расмийларининг таъкидлашича, Буюк Британия Европа Иттифоқидан чиққанидан кейин чегара назорати янада кучайтирилиши ҳақидаги миш-мишлар шароитида сўнгги кунларда ноқонуний мигрантлар Англия қирғоқларига деярли ҳар куни келмоқда.
Ички ишлар вазири Прити Пател франциялик ҳамкасби Кристоф Кастанер билан Ла-Манш бўғози орқали ноқонуний мигрантларни ташиш билан шуғулланувчи жиноятчиларга қарши кураш чораларини кескинлаштириш масаласини муҳокама қилган.
Бош вазир Борис Жонсон эса Буюк Британияга ноқонуний йўл билан келган ҳар қандай шахс қайтариб юборилиши ҳақида огоҳлантирган.
Изоҳ (0)