Шимолий Корея раҳбарияти банклар ва криптовалюта биржаларига киберҳужумлар уюштириб, 2 миллиард доллар ишлаб олгани ҳақида тарқалган хабарларни ёлғон деб атади. Бу ҳақда КХДРнинг ноқонуний даромадларни легаллаштириш (пул ювиш) ва молиявий терроризмга қарши курашиш бўйича миллий мувофиқлаштирувчи қўмитаси расмий вакили баёнотига таяниб, «Коммерсантъ» хабар берди.
«Сўнгги кунларда АҚШ ва бошқа душман кучлар хакерлар ёрдамида оммавий қирғин қуролларини яратиш дастури учун 2 миллиард долларни ноқонуний тарзда ўтказганимиз ҳақида ёлғон миш-мишларни тарқатмоқда», — дейилади КХДР ҳукуматининг БМТ баёнотига қарши берган жавобида. БМТ баёнотида бир нечта хекерлар гуруҳи, жумладан, Lazarus ҳақида сўз боради, халқаро экспертлар ушбу гуруҳларнинг ортида КХДР ҳукумати турганини таъкидлаган.
Шимолий Корея эса буни «Гитлернинг тарғибот машинасида қўлланилган эски усулларни қайта яратишга уриниш: агарда ёлғон юз марта қайтарилса, у ҳақиқатга айланади», деб атади. КХДР раҳбарияти киберҳужумлар ҳақидаги хабарларни «душман кучлари томонидан мамлакат шаънини қоралаш, санкциялар ва босимларни оқлашга бўлган уриниш» сифатида баҳолади.
Изоҳ (0)